Kehte hain paisa haath ka mail hota hai. Magar sach to yeh hai ki iske bina humara guzaara bilkul nahi hota. Soch kar dekhiye, aap chand rupayon ke sath kitne din guzaara kar payenge? Ek din? Do din? Ek hafta? Ek mahina? Ek point par aakar aapko aur paison ki zaroorat padegi hi padegi. Paisa aapko na sirf aapki basic needs jaise groceries, paani ka bill, ya dawaiyan cover karta hai, magar aapko apne shaunk poore karne ka bhi mauka deta hai.
Paisa hone se aap apne shahar se baahar nikal kar duniya dekh sakte hain. Apni education poori kar sakte hain. Paisa aapko insurance aur loans jaise benefits avail karne me madad karta hai aur roti, kapda, makaan aapke hissey lekar aata hai.
Aur ye internet jiske maadhyam se aap ye article padh paa rahe hain, isko bhi to aap paise se hi khareed paate hain.
Paisa kamana kyun zaroori hai, yeh sawaal to aaj kal dosto hum oxygen kyun lete hain yeh sawaal poochne jaisa hai.
Aaj hum baat karenge students ke baare me aur discuss karenge:
Sawaal yeh hai ki jab students ke parents kama hi rahe hain, to kya students ko paisa earn karne ki zaroorat hai?
Dekhiye, paisa kamane ke generally do reasons hote hai: Necessity aur Want. Yaani, zaroorat aur chaah. Ho sakta hai aap ki family ko ya aap ko zaroorat hai. Ho sakta hai aap financially responsible banna chahte hain. Ho sakta hai aap investment try karna chahte hain. Ya ho sakta hai aapko apne liye kuch khareedna hi kyun na ho.
In sab scenarios me aapko rok koi nahi raha. In fact, kya karna hai aur kya nahi, yeh aapki hi choice hai. Shuruaat karne se pehle bas itna sochein ki, pehla, aapka purpose kya hai aur, doosra, aap kitna aim karna chahte hai – per month and per year.
Students paisa easily kaise kama sakte hain?
- Freelancing aur Internship: Freelancing ek aisi job opportunity hoti hai jisme aap full time kaam karne ki jagah projects ya hours ke basis par kaam kar sakte hain. Apne skill level ke hisaab se aap projects le sakte hain aur ek timeline me usko deliver karke earn kar sakte hain. Plus, freelancing aapke resume ko bhi upgrade karta hai kyunki yeh ek work experience ki tarah count hota hai. Jahaan tak baat aati hai internships ki, to aksar starters ke liye generally companies stipend ya money offer nahi karti. Magar aisa nahi hamesha nahi hota hai. Ho sakta hai ki jis company me aap internship karte hain, vo aapko ek amount provide kare.
Teaching: Maan lijiye aapko koi subject acche se aata hai. Ya iss level tak aata hai ki aap doosron ko padha sakein. Us case me aap part time tutor ke roop me bhi kaam kar sakte hain. Aap chaahe to school ke baccho ko ya apne juniors ko bhi padha kar apne liye financial independence create kar sakte hain.
- Notes ke zariye: Juniors se baat aati hai aapke notes aur kitaabo ki. Aap jaise jaise apne college me senior bante jaate hain, kayin baar apne purane notes ko raddi me jaata paate hain. Notes ki jagah raddi me hi ho, aisa zaroori nahi hai. Aap vo notes online websites par ya apne kisi junior ko bhi bech sakte hain. Aur paisa kama sakte hain.
Stock Market: Stock Market ek aisa zariya hai jo aapko invest karna sikhata hai. Stock Market trading sirf ek hobby hi nahi balki kaafiyon ke liye ek full time profession bhi ban gaya hai. Stocks me kaafi kuch seekhne ko bhi milta hai – jaise sirf risks hi nahi balki calculated risks kaise lein, market ko kaise analyse karein, etc. Aapki student life stocks me shuruaat karne ke liye ek dum right time hai. To zyada nahi, thoda thoda amount chaahe to isme invest karein. Magar yaad rakhein, stocks me jitna reward hota hai, utna hi risk bhi hota hai. Yaani, agar dhyaan nahi diya to paisa doob bhi sakta hai.
YouTube: Bollywood industry me ya fir social media par aap jo actors aur influencers ko dekhte hain, unme se aise kayin log hain jinhone apne career ki shuruaat YouTube se kari thi. Aise aur bhi bahut saare log aur creators hain jinka poora career YouTube se shuru hua tha aur YouTube se hi chalta hai. Sach to yeh hai ki YouTube aapko sirf ek platform hi nahi provide karta apni reach badhaane ka magar ek certain point par aakar (ek particular number of views, likes, aur subscribers hone par) aapko money-wise bhi help karta hai. Aur kyonki student life me hamare paas thoda extra time hota hai, YouTube ek bahut accha tareeka hai na sirf apni skills improve karne ka magar thoda bahut paisa bhi kamaane ka.
- Startup aur Business: Agar aapme entrepreneurial spirit aur ek idea hai to aap college me hote hue bhi apni khud ki company ya business shuru kar sakte hain. Ab, zaroori nahi hai vo company ya business aapko monetary benefits denge. Magar, padhai ke sath sath money earn karne ki ek possibility ko janam zaroor denge.
Kya social media students ki help kar sakta hai?
– Apni profile build kar sakte hain
– Apna ek small business khol sakte hain: Aajkal jitne bhi small ya medium sized businesses chal rahe hain, Social Media usme un business owners ki bahut help karta hai – na sirf customers laane me magar apna brand banane me bhi
– Apni services ke liye customers grow kar sakte hain
– Digital Marketing aur Social Media Management ke baare me jaan sakte hain aur fir in skills ko use karke Freelance ya Intern bhi kar sakte hain
– Network kar sakte hain: No matter what, aapko contacts ki zaroorat kabhi na kabhi padti hi hai.
Aakhir college bhi to ek networking experience hota hai. Social Media ke zariye aap apne followers aur friends ke touch me reh sakte hain aur jinko aap khud follow karte hain, unse bhi pehchan bana sakte hain
Ye aise kuch tareeke hain jo aapki student life me paisa kamane me madad kar sakte hain. Agar aapko lagta hai ki aapko need hai ya fir aap side hustle karke finances ko manage karna chahte hain, to in tareeko se vo financial independence gain kar sakte hain.
