Hindi mein janein Email / Gmail use karne ki advance tips
Aajkal sabko pata hai ki Email kya hota hai aur aap sabka Gmail address to zaroor hoga hi.
Dekho agar aapka Email address hai to aapko Email address banana bhi ata hi hoga hi. Nahin bhi aata hai to kisi na kisi ne aapka Email address to bana hi diya hoga.
To ab Gmail address bhi hai par kya aapko Gmail theek se use karna aata hai ya nahi?
Ab purane zamane ki chitthi ka khat to log kam hi bhejte hai kyunki ab naya zamana hai.
Chitthi ayi hai ayi hai watan se, chitthi ayi hai Pankaj Udhas ki Purani Ghazal
Mera Naam Ashutosh hai aur main 2005 se job kar raha hun. Maine apne career mein anginat mails likhi hai to maine socha ki main aapko Email ya Gmail ke bare mein thoda gyaan de dun.
Is blog mein mein aapko bataunga Email istemal karne ki aisi zaruri tips jinse aapki bole to zindgi badal jayegi. Kyon Ki koi cheez ko agar aap use karte ho to dhang se hi karo warna to khat hi likha karo na.
Is article mein aap janeinge (Link pe click karke us section pe pahaunch sakte hai)
Email use karne ke fayade ya advantages of using Email in Hindi
Email kaise likhe in Hindi ya Email format tips
To, CC, BCC kya hota hai aur unko dhang se kaise use karein
Pehle sabse bada sawal
Advantages of Email in Hindi ya Email use karne ke fayde
Aap soch rehe honge ki yaar itna bada kalesh hai Email likhna.
Agar aap job kar rahe hai to aapko Email likhna ek bahut bada time waste lagta hoga shayad.
Aap sochte honge ki aap baaton mein bhi to baat kar sakte ho to Email kyu likhein?
email ke ISTEMAL se baatein kam hoti hai aur kam zyada. samjhe barkhurdar?
Par yeh to wahi baat hui ki hum kuch bhi likhte hi kyu hai?
Baaton baaton mein bhi to baat ho sakti hai par yeh nahi hai. Baatein to theek hai par jo likha jata hai uska mahatva hi alag hota hai.
Aapko main kuch situations ya stithian batata hun jab Email likha hota to pachtana nahi padta
Situation 1 – Boss jo jatana ki aap bahut kaam kar rahe ho ya boss ko loop mein rakhna
Dekhiye boss ek aise prani hote hai jinko aapki jaan khane ka paisa milta hai. Boss hamesha apse puchte rehte hai ki aapne kya kiya, kya nahin kiya aur nahin kiya to kyu nahi kiya.
Boss ki zubaan pe lagaam lagane ka best tarika hai ki aap jo kuch karo uske Email bhej do. Main sharat lagata hun ki woh aap ki mail ko nahi padheinge par agli baar jab woh aapki jaan khane aayenge aap bolna ki sir maine kaam kar liye hai aur Email bhi bhej diya hai. Ek do baar aisa hoga aur phir woh apse yeh puchna hi band kar denge. Bas jeevan ho jayega asaan.
Isko boss ko loop mein rakhna kehte hai. Boss ko itni Emails bhejo ki woh apse pareshan hoke aapko promote kar denge aur phir aap boss ban jaoge aur aapko sab Emails bhejenge.
apni jaan bachao, boss rupi rakshas ko loop mein rakho email bhej ke
Situation 2 – Likhit pramaan jise aap ka bachav ho paye
Aap office mein kaam karte ho aur aapke sahkarmi ya colleague ko apne kuch karne ko zabani kaha aur usne kiya nahin.
Baad mein woh kaam hua nahin aur jab boss ne pucha ki kyu nahi hua woh sahkarmi mukar hi gaya. Woh jhoot bolne laga ki aapne kaam karne ko kaha hi nahin tha to phase to aap hi.
Ab agar aapne akal laga ke pehle hi Email bhej diya hota aur apne boss ko CC kar diya hota to koi praman to rehta ki aapne bataya tha aur isliye galti aap ki nahi uski hai.
Situation 3 – Minutes of the meeting (Boss ki impress karna)
Boss ke saath aapki lambi meeting hui jismein unhone kafi kuch aapko karne ko kaha. Ab aap smart ho aur jaise hi meeting khatam hui aapne notes dekhe aur sare points sankshep mein karke ek ‘meeting minutes’ ki mail bosss ko bhej di. Bas, boss khush woh sochenge ki aap kitne karmath ho ki pehli baat to aapne kafi dhyaan se meeting mein sab socha aur mail pe sab likh ke bhej bhi diya. Agar aaap yeh karoge to aapka promotion to zarur ho jayega.
email bhejna samajhdari ki baat hai. akal buffalo se badi hi hoti hai
Situation 4 – Project management
Chalo aapne meri baat suni aur Email ka bharpoor istemal kiya aur promotion paake aap hi boss ban gaye.
Aapne ek project ko plan kiya hai aur meeting mein aapne is plan ko share kiya. Aapke team members ko aapne alag alag kaam diya hai. Ab log to hote hi kaamchor hai to aapne bola to bahaut par woh sab bhool gaye ya jaan ke bhi anjaan ban gaye sab.
Agar aap smart boss ho to aap meeting khatam hote hi ek Email likhoge sab team members ko jis mein aap pure plan ko bataoge aur sab team members ki responsibilities bhi bata doge.
Usi mail pe reply karne team members batayenge ki unhone kya kiya aur kya nahi kiya. Aap kaam na karne par team members ko daat bhi sakte ho aur apna boss wala gyaan bhi pel sakte ho. Email string kisi bhi project ko manage karne ka sabse accha aur asan tarika hai.
Chalo ab boss banne ke sapne abhi chodo. Pehle main aap ko samjhata hun ki Email likhi kaise jati hai
How to write Email in Hindi
Aap sabne Hindi aur English shayad padhi hogi school mein. Email bhi ek letter ki tarah hi hoti hai par aapko essay nahi likhna hota hai aur bas kaam ki baat karni chahiye.
Email ka format kya hota hai?
Pehle main aapko Email ya Gmail ke sections ya bhaagon ke bare mein bata deta hun. Jab aap compose Email pe click karte ho Gmail mein to aisi window aati hai.
(1) To: Yahan aap jisko Email bhejni hai unka Email address likhte ho.
To ki Tips
- Aap bahaut sare Email address bhi To mein dal sakte hai ek ek karke.
(2) Cc: Iska matlab hota hai Carbon Copy matlab Hindi mein jinka Email address aap yahan likhte ho unko Email ka ek copy milta hai. Cc ka istemal tab karna hota hai jab aap is Email ko kuch aur logon ko bhejna chahte ho par yeh Email unko sambodhit nahi hoti hai.
CC ki TIPS
- Zyadatar aap apne boss ko business Email mein CC mein rakhte ho jisse boss ko yeh pata chale ki aap bahut kaam kar rahe ho.
- Agar koi aap ka kaam nahi kar raha hai job pe to kaam nikalne ka sabse acha tareeka hai ki ek mail likho jis mein aap usse kam karne ko keh rahe ho aur us mail ko boss ko bhi CC kar do.
(3) Bcc: Iska matlab hot ahai Blind Carbon Copy. Agar aap To aur CC walon ko batana nahi chahte ki aao kisi aur ko is Email ki copy bhi bhej rahe ho to unka Email address Bcc mein dal do. Unko mail ki copy bhi pahaunch jayegi aur kisi ko pata bhi nahi chalega.
Bcc ki tips
- Agar aapko bahut sare logon ko mail bhejna hai aur un sabke Email address aapko auron ko nahi dikhana hai to aap To section mein apna mail dalo aur sare baki Emails Bcc mein dal do.
(4) Subject
Jaise hum school ke letter mein Subject likhte the waise hi Email ka subject bhi likha jata hai. Iska matva yeh hota hai ki Inbox mein Email ka Subject dikhta hai aur subject dekh ke Email jisko milti hai usnko yeh pata chal jata hai ki Email mein kya hai.
Email Subject tips
- Subject ek tareeke se mail ka shirshak ya heading hoti hai jisko padh ke samajh aa jata hai ki Email kis cheez ke bare mein hai
- Subject ko jitna direct rakh sakte ho utna accha hai. Kaam ki baat karo aur bekaar ki baat nilak do
(5) Email Body
Yeh woh jagah hai jahan Email likhi jati hai. Email ka format aisa rakhna chahiye
Greeting: Yahan aap jisko Email bhej rahe ho usko Hello bolte ho. Aajkal ke yug mein greeting ko zyada formal nahi rakhna chahiye par kuch rules hai jinko aapko follow karna hota hai
- Agar aap jinko mail bhej rahe ho unko jante ho tab aap greeting mei Hi ya Hello likh sakte ho
- Agar aap unko nahin jante tab Dear (Naam) likhan hota hai so Dear Mr Sharma, Dear Madhu etc likhna chahiye
- Agar aapko pata nahin hai ki jinko aap mail bhej rahe ho woh aadmi hai ya aurat to likhiye: Dear Ma’am / Sir
Body: Email body mein aap Email likhte ho. Mera sujhav yah hai ki bakwaas na karke aap seedha seedha mudde ki baat karein. Business Emails padhne walon ke paas waise bhi time nahi hota hai to unko jald se jald samajh ana chahiye ki aap kya bat kar rahe ho aur aap kya chahte ho unse.
- Paragraph use karne zaruri hai Email mei warna padhna muhskil ho jata hai. To thodi lines ke baad ek space dal dijiye.
- Mail bhejne se pehle ek ya do bar usko padh lein kyunki galti ho sakti hai
- Business mail dhyaan se likhein. Kisi ko gali na dein aur ashiqi nahi kare. Bas matlab ki baat
Sign off: Sign off mein aap apna naam likho. Aap Sincerely, Regards atyadi bhi use kar sakte ho.
(6) Signature: Professional lagne ke liye aapko ek accha sa signature bana lena chahiye.
Signature Gmail mein settings mein banaya jata hai
Pehle mailbox ke top right pe gear icon ko click karo
Phir settings pe click karo aur neeche scroll karke
Phir neeche scroll karke signature type kar lo.
(7) Formatting options: Yahan aap Email body ke font change kar sakte ho, Bold ya Italic ya underline mein text ko set kar sakte ho, text ka color bhi change kar sakte ho aur text ki orientation bhi. Yahan se aap bullet point aur numbered list bhi bana sakte ho.
(8) Attachment options etc: Yahan se app attachment add kar sakte hai, text mein link dal sakte hai, emoji dal sakte hai (Business Emails mein Emaiji mat dalna please, informal lagta hai) aur picture attach kar sakte hai.
To yeh hota hai Email ka format.
Ab main aapko apne tajurbe se kuch tips deta hun
Advance Gmail tips in Hindi
Email sab bhej sakte hai par kuch aisi tricks hai jin ko istemal karke aap pareshani se back sakte hai.
Galti se Mail bhejne se bachne ka tarika
Sabse embarrassment ki baat tab hoti hai jab apne koi important mail likhi aur check karne par bhi aapne kuch badi galti kar di aur bhej di. Iske 2 samadhan hai.
Desi tarika
Mere purane boss nein is problem ka bahut hi accha desi upay bataye. Mail likhte hue To aur CC mein se Email address nikal do ya. Mail likho, kafi baar check kar lo aur phir hi Email address dalo.
Angrezi tareeka
Kehte hai ki kamaan se nikla teer wapas nahi aata par ek tareekh hai jisse bheja hua mail wapas aa sakta hai. Aap Gmail settings mein jake mail sending mein delay laga sakte ho.
Aapko mail setting mein jana hai
Neeche scroll karo aur phir ek section hoga ‘Undo send’ wahan ek send cancellation time dal do. Main 10 second rakhta hun.
Jab aap koi bhi mail bhejoge to neeche left corner mein ek undo ka option ayega 10 second ke liye, to agar aapne falti kari hai to aap usko click karke main ko undo kar sakte ho.
Inbox ko saaf rakho
Sabse badi tension tab hoti hai jab aapke inbox mein lakhon Emails hoti hai.
Inbox mein wahi mails honi chahiye jinpe kuch gatividhi chal rahi hoti hai. Purani mails ko archive kar dena accha hota hai. Archived mails aapke Inbox mein nahin rehti par delete bhi nahi hoti. Baad mein aap un mails ko Gmail ke search function se dhund sakte ho.
Asha karta hun ki aapko kuch accha gyaan mil gaya hoga Email writing pe.
Min is article ko update karte rahunga. Agar aapko koi doubt hai to comment karke zarur baatein aur main aap ke sawalon ka jawaab zarur dunga.
Join Josh Skills Basic Computer Skills Course
Aaj kal computer ka zamana hai. Har voh kaam jisme pehle bahut time,effort aur money waste hota tha abh asani se computer pe kiya ja sakta hai. Computer ka istamaal aaj kal har taraf kiya jata hai. Basic computer skills ana aaj ke waqt mai bahat hi zaruri hai. Basic computer skills sikhna isliye zaruri hai take aap apne worklife ko easy aur efficient bana sako. Aur is computer technology ka wisely istamaal kar sako.
Is course mai aap Computer ke Basics pe gaur denge jaise:
- Basics of a Computer system and it’s operation.
- Internet Technology
- Email and Communication
- Use of Microsoft word, Microsoft Powerpoint and Microsoft Excel
- Introduction to Advanced Computer skills and tools
- Jobs that require computer skills
Toh aaj hi shuru kare apni learning journey Josh Skill ke courses ke sath.
