Jaaniye Kya Hai Files by Google Aur Isko Use Kaise Kare?

Smartphone hum sabki zindagi ka ek ahem hissa ban gaya hai. Aaj ke daur mein hamare phones mein messages, contacts, images, videos, etc hote hai. Phone mein itni files hoti hai ki kuch bhi store, search ya delete karna ek struggle ban jaata hai. Isi samasya ko dhyan mein rakhte hue Google ne ek app banaya hai ‘Files by Google’ jo aapki zindagi asaan bana dega.

Files by Google ke baare mein puri jaankari ke liye iss article ko dhyan se padhe.

Files by Google kya hai ?

Files by Google ek aisi file manager application hai jo na keval phone mein space management karne mein madad karti hai balki files ko asaani se dhundhane aur share karne mein bhi kaam aati hai. Iss app ke madhyam se aap apne bhare hue smartphone ko ek hi click mein khaali kar sakte hai. Yeh phone ka space management acche se karti hai taaki phone mein aur files store karne mein dikkat na ho. 

Yeh app har tarah ki files support karti hai jaise ki documents, photos, videos, audio aur applications. Filhaal yeh app sirf android phones mein hi available hai. 

Files by Google se aap 3 tasks kar sakte hai:

1. Browsing: Media files ko asani se search kar sakte hai
2. Cleaning: Unwanted files ko delete kar sakte hai
3. Sharing: Files share aur receive kar sakte hai vo bhi bina internet ke

Files by Google ki sabse anokhi baat yeh hai ki iss app ke ‘Share’ feature se aap bina internet ka use kare, safely apne phone se files ko send ya receive kar sakte hai free mein. 

Files by Google kyun use kare?

Aksar logo ke phone mein storage space nahi hota aur isi wajah se phone slow kaam karta hai aur hang hone lagta hai. Iske alava phones mein file manager hone ke bawajood, data alag alag jagah store hota hai. Isliye ye zaruri hai ki phone mein ek accha file manager ho taaki phone ka storage space manage ho sake.  ‘Files by Google’ aisa hi ek app hai jismein aap ek click mein apne phone ko clean, files ko search ya share kar sakte hai. Aapko ek hi app mein 3 app ke features mil rahe hai – Search, Clean aur Share. Iss app se aapke saare storage aur data issues  ek click mein solve ho jaate hai.

Files by Google App ke fayde

1) Ye application free hai

2) Simple aur asani se use kar sakte hai

3) Ek app mein 3 app ke features hai (File Cleaning, Sharing aur Browsing)

4) Extra files asaani se delete karke, phone me space badha sakte hai

5) Bina internet use kare safely data transfer kar sakte hai

Files by Google ko install karke kaise use kare iske baare mein janane ke liye iss video ko dekhe:

Files by Google ko kaise use kare?

(Photo ko zoom karke dekhne ke liye photo par click kare)

Step 1: Google Playstore mein jaaye aur Files by Google ko search karke, download karke, install karle

Step 2: App ko ‘Open’ kare aur permissions ko allow kare

Step 3: App ko open karte hi aap dekh sakte hai ki phone mein kitni space bachi hai

Step 4: Yeh app aapke files ko automatically sort kardega aur aapko redundant files dikha dega. Junk files, old screenshots, duplicate files, whatsapp se aaya hua data, videos, downloaded files sab alag alag aap dekh sakte hai.

Step 5: Iske baad aapko 3 options dikhenge:  

1. Clean 
2. Browse
3. Share

• CLEAN Option: 

Iss feature mein automatically files ki sorting hojaati hai aur aap asaani se unwanted files par jaakar unko clear ya delete kar sakte hai.

App mein automatically aapko ‘Junk Files’ display ho jayegi. Unko delete karne ke liye uss par click kare aur ‘Temporary app files’ ke options ko select karke ‘Clear’ par click karde.

Space free karne se aapke phone ki performance bhi improve hoti hai, speed badhti hai, hang kam hota hai aur aap nayi apps bhi use kar sakte hai. Iske alava aap apni saari zaruri files ka back up drive mein kar sakte hai jisase files drive mein safely store ho jaati hai aur phir aap unko phone se delete karke apne phone ke space khaali kar sakte hai.

• BROWSE Option:

Iss feature mein file ke type ke according saari files categorize ho jaati hai aur aap asaani se categories par click karke files ko search kar sakte hai . Ye categories hai:

1. Downloads
2. Images
3. Videos
4. Audio
5. Documents & Others
6. Apps

Yahan par yeh app aapko files ke liye Move, Copy Share, Rename, Back up to Google Drive jaise options bhi deti hai. 

Iss feature ki madad se aap apna kaafi time save kar sakte hai. Ab aapko alag alag jagah jaake files dekhne ki koi avashyatka nahi hogi kyunki saari files aap ek jagah se hi access kar payenge.

• SHARE Option:

Iss feature ki madad se bina internet ke apne phone se files send ya receive kar sakte hai. Iss  mein aapko 2 options display honge:

1. Send : Iss option se aap kisi bhi file ko apne phone se send kar sakte hai

2. Receive:  Iss option se aap kisi bhi file ko apne phone mein receive kar sakte hai

Waise to file share karne ke liye kaafi apps available hai par woh apps kai baar safe nahi hoti. Unke use se aapke phone ko data theft, viruses aur malware ka darr rehta hai. Lekin iss app se aap jaldi aur safely files transfer kar sakte hai bina internet use kare. 

Files by Google ek app ke badle mein aapko teen apps ka labh deti hai. File management ko aasan banane ke saath saath aap iske use se apne phone ki performance bhi boost karte hai. Toh isse download kijiye, use kariye aur khud dekhiye ke apne smartphone usage mein improvement.

Agar aapko Files by Google app ke baare mein koi bhi jaankari chahiye to niche comment kare aur humko jawaab dene ki puri koshish karenge. Padhane ke liye aapka dhanyawad!

Join Josh Skills Basic Computer Skills Course

Aaj kal computer ka zamana hai. Har voh kaam jisme pehle bahut time,effort aur money waste hota tha abh asani se computer pe kiya ja sakta hai. Computer ka istamaal aaj kal har taraf kiya jata hai. Basic computer skills ana aaj ke waqt mai bahat hi zaruri hai. Basic computer skills sikhna isliye zaruri hai take aap apne worklife ko easy aur efficient bana sako. Aur is computer technology ka wisely istamaal kar sako.

Is course mai aap Computer ke Basics pe gaur denge jaise:

• Basics of a Computer system and it’s operation.
• Internet Technology
• Email and Communication
• Use of Microsoft word, Microsoft Powerpoint and Microsoft Excel
• Introduction to Advanced Computer skills and tools
• Jobs that require computer skills

Toh aaj hi shuru kare apni learning journey Josh Skill ke courses ke sath.