Janiya job interview tips in Hindi udahran ke saath is article mein.
Apna Topic Chunne
Interview Kya Hai?
Interview Kitne Type Ke Hote Hai?
Telephonic Interview Kya Hai?
Telephonic Interview ke Tips
Face to face Interview Kya Hai?
Face to Face Interview Tips – Kya Kare?
Face to Face Interview Tips – Kya Na Kare?
Interview kya hai?
Kisi bhi job ko paane ke liye sabse zaruri hai interview clear karna. Toh sabse pehle janenge ki aakhir interview ka matlab kya hota hai?
Naukri dene wale aur naukri khojne walo ke beech mein formal baat-cheet ko ‘Interview’ kehte hai. . Job interview lene walo ko ‘Interviewer’ ya ‘Recruiter’ bolte hai aur interview dene walo ko ‘Interviewee’ bolte hai.
Interviewer interviewee se unke baare mein kuch sawaal karte hai jaise ki self introduction, education, interest, job aur career related. Interview mein zyadatar job aur career se related hi sawal pooche jaate hai. Iss article mein aap janenge ki Job interview kitne prakar ke hote hai aur usmein kya karna chahiye aur kya nahi. Interview hota kya hai iske baare mein toh aap upar jaan hi chuke hai.
Interview tips ke alawa aap ye bhi janna chahenge ke interview ki taiyyari kaise karein. Niche click karke jane ke kaise karein interview ki puri taiyyari –
Interview kitne type ke hote hai?
Interview waise toh bahut type ke hote hai lekin sabse popular 2 type ke hi maane jaate hai:
1.Telephonic Interview
2.Face to Face Interview
Telephonic Interview
Telephonic interview ka matlab hota hai phone ya mobile ke through interview hona. Aajkal companies candidates ko face to face interview par bulane se pehle unka telephonic interview leti hai. Ye sabse pehla interaction hota hai interviewer aur interviewee ke beech mein.
Telephonic interview employer aur candidates ke liye interview process ko aasan kar deta hai aur iske kaafi phaayade bhi hote hai. Ye dono ke liye cost saving aur time saving hota hai. Telephonic interview face to face interview se kam time mein ho jaata hai aur iske liye kahi jaana bhi nahi padhta hai.
Telephonic Interview Tips
Telephonic interview ko face to face interview ki tarah hi seriously le. Yaad rakhe telephonic interview mein candidates ka screening hota hai aur jo candidates ismein accha perform nahi karte unhe interview process se eliminate kar diya jata hai, toh iss ke liye acche se prepare karein.
Interview tips jinpar khaas dhyan dene se aap telephonic interview ko pass kar sakte hai:
1.Phone ko full charge karle, phone ko network area mein rakhein aur phone ka volume tez rakhein. Interview ke time ka reminder/alarm pehle se hi set karle taaki aap interview ka time na bhulein.
2.Interview dene ke liye Headphones ka use karein.
3.Telephonic interview ke liye ek shaant aur acchi jagah chunen. Generally companies pehle se hi telephonic interview ki timings bata deti hai. Isliye interview ke liye ek shaant room pehle hi chunle taaki interview ke dauraan koi shor na ho. Pehle hi TV, Radio ko band karde aur ghar mein agar bacche hai toh unko dur le jaye. Interview ke dauraan room ko andar se lock karle aur ghar mein sabko bata de ki interview ke duraan koi aapko disturb na karein. Agar aap interview ke timings ke duraan ghar pe nahi hai toh ek shaant jagah dekhe jaha zayda log na ho aur shor na ho.
4. Interview ke time apne CV/resume ki hardcopy aur notes likhne ke liye pen aur notebook samne rakhe.
5. Agar interview ke dauraan aapka call kat jaaye toh turant aap call back karein.
6.Agar aapko interview ke beech mein dusra call aa raha ho toh uss call ko na uthaye.
7.Telephonic interview mein smile karte hue, calm aur bina chilaye baat karein. Apni tone ko balanced rakhe. Baat karte hue Ok, Yes Sir/Madam jaise words use kare taaki interviewer ko pata rahe ki aap dhang se baat sun rahe ho.
8.Telephonic interview mein communication skills par bahut dhyan diya jaata hai toh apni baat karne ka tareeka accha rakhe. Professionally baat kare. Fake accent mein baat na karein. Agar aapko English mein baat karne mein dikkat hoti hai toh interviewer ko pehle hi bata de.
9.Interviewer ko interrupt na kare. Jab vo bol rahe ho toh unki baat ko beech mein na kaate. Unko pehle apni poori baat karne de aur uske baad hi aap apni baat bole.
10.Agar aapko interview mein koi baat samjh na aaye to sach bole ki ‘aapko samjh nahi aaya’ hai aur interviewer ko request kare ki wo us point ko repeat karein.
English Improvement ke liye Click Karein
Face to Face Interview
Face to Face interview ka sabse popular aur purana tareeka hai interview conduct karne ka. Ise ‘personal interview’ bhi kehte hai. Iss type ke interview mein employer aur candidate aamne samne baat-cheet karte hai. Lag bhag har job mein face to face interview dena hota hai.
Face to face interview ka maksad ye hota hai ki interviewer aapke baare mein achhe se jaan sake. Interviewer aapki personality, attitude, work experience aur ye dekhta hai ki kya aap uss company mein achhe se yogdaan de sakte hai ya nahi. Is interview mein candidate ke pass bhi mauka hota hai ki vo apne saare sawaal pooche aur job role ke baare mein achhe se jaane.
Face to face interview tips
Job interview dene mein aksar bahut logo ko darr lagta hai. Log bahut nervous hojate hai interview dene ke naam se aur iss nervousness ke chakkar me bahut si galatiyaan kar baithte hai jisse interview clear nahi ho pata. Interview dete waqt kuch zaruri interview tips ka agar dhyan rakha jaaye to interview accha hota hai aur job milne ke chances badh jaate hai.
Interview mein kya kare?
Neeche kuch zaruri interview tips jinka dhyan rakhne se interview clear karne ke chances badh jaate hai:
1) Professionally dress up ho
Interview mein interviewer par accha impression banana bahut zaruri hai aur sabse pehle jo interviewer ek candidate mein dekhte hai vo hai unki dressing. Dressing aapki personality ko reflect karta hai aur kyunki interview ek professional setup hota hai toh ismein candidate ki dressing bahut important hoti hai. Koi bhi interview ho, humesha formally dress up ho kyunki ye interview ka ek golden rule hota hai.
Interview dress for ladies and gents ₹ 1800 mein kaise kharide jaane ke liye is video ko dekhe ⇓⇓
Professional wear for Women (Formals)
Women Indian ya western formals dono mein se ek option pick kar sakti hai, job ke basis par.
i) Indian Formals: Kurta with Salwar/Palazzos/Leggings, Saree
ii) Western Formals: Formal/Semi Formal shirt with Trousers, Formal Dresses knee length tak ki ya Blazer
( Formals subtle colours ke hone chahiye jaise ki white, light pink, peach, light blue, grey, black etc…)
iii) Formal Footwear: Formals heels, bellies, flats
iv) kam se kam makeup hona chahiye
Interview mein kya cheezein nahi pehainni chahiye?
i) Bright ya loud colours jaise ki bright red, orange, pink etc.. nahi pehainney
ii) Deep neckline, transparent clothes se bacche.
iii) Sports shoes, slippers nahi pehainni chahiye.
Professional wear for Men (Formals)
i) Western Formals: Formal shirt Trousers/Pants, Belt ke saath. Iske alava tie, blazer bhi pahena jaa sakta hai.
ii) Shirt: Sirf subtle colours jaise ki blue, white, peach, grey, light pink etc..
iii) Trousers: Colours jaise ki black, beige, navy blue, grey etc..
iv) Belt: Plain colour hi choose kare preferably black, dark brown aur navy blue colour
v) Formal Footwear: Formal shoes (black, brown colour) socks ke saath
Interview mein Kya cheezein nahi pehainni chahiye?
i) Bahut bright ya chamkeeley colours jaise ki bright red, orange, pink etc.. bilkul na pehainey
ii) Leather jacket ya denims (jeans) bilkul na pehainey kyunki vo informal garments mein aate hai
iii) Sports shoes, slippers nahi pehainni chahiye
iv) Bahut badhi beard na rakhein aur interview mein jaane se pehle trim aur neat karle
v) Hair chhote rakhe kyunki badhe baal unprofessional lagte hai
2) Time se pehle pahuche
Koi bhi company kisi ko bhi hire karne se pehle kuch trait (gunn) dekhti hai jisme sabse zaruri trait hai ‘Punctuality’. Har company chahati hai ki uske employees time se office aaye taaki office mein discipline maintain rahe aur efficiency bani rahe. Isliye interview ke liye time se pahuchna bahut zaruri hai. Agar koi candidate interview mein late pahuchte hai toh interviewer ko yeh lag sakta hai ki yeh candidate aaj late hue hai toh office bhi late hi aayenge jissey interviewer par kharab impression padh sakta hai. Toh dhyan rakhe, ki interview ke liye aap kam se kam 10 minute pehle pahunch jaaye.
3) Resume lejana na bhule
Interview mein jaane se pehle ye sunishchit karle ki aapke pass apka Resume/CV/Bio-data ki hard copy ready hai. Agar interviewer aapse aapka resume maange toh aapke paas resume ki copy honi chahiye. Resume ko fold na kare aur ek file me lekar jaaye.
Ek accha resume kaise banaya jaata hai iss baare me jananae ke liye yaha click kare
4) Mobile ko switch off ya silent kar de
Jab bhi aap job interview mein jaye to aap apna mobile silent par karna na bhoolein kyunki agar interview ke beech me aapko koi call aaya toh interview process disturb ho jata hai joh ki ek acchi baat nahi hai. Isliye achha yahi rahega ki interview se pahle aap apna mobile switch off karde ya silent par karke bag me rakhde.
5) Apni body language ko maintain kare
Interview ke dauraan aapki body language ko sahi rakhna bahut zaruri hai. Aapki body language yeh reflect karti hai ki aap kaisa mehsoos kar rahe hai. Interviewer ko aapki body language se aapke baare mein bahut kuch pata chalta hai toh isliye interviewer aapki body language ko bahut dhyan se dekhte hai. Isliye sahi body language maintain karna zaruri hai, interview clear karne ke liye.
i) Tareeke se baithe. Apne body posture ka khaas dhyan rakhe
ii) Handshake confidently kare
iii)Interview dete waqt eye contact rakhe. Agar interview me ek se zyada log hai to sabse eye contact maintain kare. Sabki taraf dekh ke hi baat kare
iv)Apni tone ko audible (madhaym) aur balanced rakhe aur confidence ke saath baat kare
Personality Development ke liye Click Karein
6) Smile karte rahe
Interview mein smile karte rehna chahiye. Interview me friendly smile se interviewer ko yeh pata chalta hai ki aap comfortable aur utsaahit (confident) hai interview ke liye. Smile ek pleasant environment bana deti hai aur interview ek stressful process ho sakta hai jissey smile aasaan bana sakti hai. Par ek chiz ka dhyan rakhe, zarurat se zayda bhi koi chiz acchi nahi lagti.
Aap in articles ko bhi padh sakte hain
7) Dhyaan se sunkar answer kare
‘Listening’ yaani sunana, sabse important point hota hai kisi bhi communication (baat karna), jaise ki interview. Jab aap se koi baat karta hai toh samne wale ki baat sunna bhi utna hi zaruri hota hai jitna bolna hota hai. Isliye interview mein bahut dhyan se recruiter ki baat suney aur dhyan de ki vo aapse kya puchh rahe hai aur uske baad hi soch samjhkar kar answer kare. Interview me jaane se pehle apna mind clear karle aur kisi aur cheezein ke baare me na soche kyunki vo ek distraction ho sakti hai jissey ki aapka interview kharab ho sakta hai.
Agar aapko koi point ya sawaal nahi samajh aaye toh aap interviewer ko sach bataye ki ‘aapko samajh nahi aaya hai aur vo uss point ko repeat karde’. Issey interviewer ko aapke baare me do cheezein pata chalengi ki aap ‘Attentive Listener’ ke saath ‘Honest’ bhi hai.
8) Confidently baat kare aur clearly answer de
Interview me confidence ke saath baat kare. Agar aap confident nahi toh ye aapke interview mein reflect hoga aur koi bhi company aise candidate ko hire nahi karengi jisme confidence ki kami ho.
Ek aur point jiska dhyan rakhna zaruri hai voh ye hai ki ghooma phiraakar jawaab na de kyunki aisa karne se recruiter kuch bhi samajh nahin paayenge aur aapke liye pareshaani ho sakti hai. Isliye clearly aur to-the-point hi answer kare.
9) Khaaana Khake jaaye (Eat Properly)
Agar aap interview mein bina kuch khaaye jaayenge to aapki energy down hojayegi kyunki aapko pata nahi ki interview mein kitna time lag sakta hai. Isliye energy level maintain rakhne ke liye acche se khake jaaye aur ho saKe to saath mein koi snacks ya chocolate carry karke jaaye.
Iske alawa aap ye bhi jaanna chahenge ke generally interview mein kya poocha jata hai. Niche click karke jaane interview mein kya poocha jata hai –
Janiye interview mein kya poocha jata hai
Interview mein pooche jane wale sawal
Interview mein kya na kare?
Bahut log interview se ghabrate hai aur unko yeh jaankari nahi hoti ki interview kaise dete hai aur kin baaton ka khaas dhyan rakhna chahiye. Yahi wajah hai ki log interview me aisi cheezein kardete hai joh unko nahi karni chahiye aur inhi galtiyon ki wajah se unka interview clear nahi ho paata. Niche kuch interview tips hai joh aapko nahi karni chahiye interview ke dauraan:
1) Casually dress up na ho aur untidy na dikhe
Interview mein casual kapadhe kabhi bhi na pahane. Interview mein aapne kya pahana hai is baat par khass dhyan diya jaata hai. Agar aap interview mein casual kapdhe jaise ki ‘jeans aur t-shirt’ pahanke jaate hai toh interviewer ko yeh lag sakta hai ki aap job ke liye bilkul bhi serious nahi hai kyunki aapke kapadhe aapki personality aur attitude dikhate hai.
Iske alava aap kaise dikh rahe hai is par bhi khaas dhyan de. Untidy look me interview dene kabhi bhi na jaaye.
Iske baare mein poori detail ke liye upar padhe
2) Phone use na kare
Interview mein kabhi phone use karne ki galti na kare. Phone ko table ya haath mein na rakhe. Agar aapko koi bhi call ya message aata hai toh usse interview khatam hone ke baad hi dekhe. Agar aap interview ke dauraan phone use karte hai toh aap interview process ko disturb kar dete hai aur yeh aapke liye negative ho sakta hai.
3) Jhooth na bole
Kabhi bhi jhooth na bole. Apne aur apni abilities ke baare mein kuch bhi jhooth na bole. Resume mein sirf vahi likhe jo aapne sach me achieve kiya hai kyunki agar company ko pata chal jaaye ki aapne job paane ke liye jhoothi baatein boli hai toh aapke naukri milne ke chances khatam ho jaate hai. Iske alava companies verification bhi karti hai aur agar aapne interview mein kuch bhi jhooth bola hai toh unko pata lag sakta hai aur koi bhi company aise candidate ko nahi lengi joh honest na ho. Honesty bahut zaruri hoti hai aur yeh ek bahut important trait hai jo har company chahati hai apne employees mein.
4) Interviewer ko interrupt na kare aur ghamandee na bane
Jab interviewer kuch bol rahe ho toh beech me bolkar unki baat ko kabhi na kaate. Interviewer ko unki baat poori karne de aur uske baad hi aap bole. Kabhi bhi interviewer ko interrupt nahi karna chahiye. Iske alava kisi bhi baat ko lekar ghamandee na bane. Yeh cheezein aapke khilaf ho sakti hai.
5) Apni purani company ke liye kuch bhi negative na bole
Jab bhi aap kisi nayi company mein interview dene jaata hai toh aapse apke boss aur aapki purani job ke baare mein puccha jaa sakta hai. Kabhi bhi apni company, boss ya co-workers ke baare me negative na bole. Agar aapko koi bhi dikkat hai toh uske baare mein interview mein bolne se bacche kyunki kuch bhi negative bolna aapke against ho sakta hai isiliye ‘positive points’ par hi focus kare.
6) Interview pe jane se pehle smoke ya drink na kare
Agar aap smoke karte hai toh yeh dhyan rakhe ki aap interview se pehle smoke na kare kyunki smoking karne se apke muh mein se smell aa sakti hai joh ki acchi baat nahi hai. Agar interviewer smoke karte hai aur aapse pucchte hai smoke ke liye toh aap tab bhi smoking na kare.
Interview mein aap kaise behave karte hai yeh bahut matter karta hai to aisi koi bhi chiz na khaaye jissey apka impression kharab ho. Isliye smoking, tobacco, drinking jaisi cheezein bilkul bhi na kare. Iske alava interview ke dauraan chewing gum na khaaye.
7) Offensive words ka use na kare
Aap kaise baat karte hai aur aap kin kin words ka use karte hai, ye har interview mein dekha jaata hai. Isliye offensive ya abusive words ka use bilkul bhi na kare.
8) Religion, politics jaise topics ke baare mein baat na kare
Interview mein religion, caste ya politics jaise subjects ke baare mein bilkul bhi baat na kare. Agar aap kisi ek particular party ya religion ke supporter hai toh apne viewpoint ke baare mein interviewer se baat na kare. Yeh subjects bahut serious aur sensitive ho sakte hai.
9) Khud se salary, bonuses ya holidays ki baat na kare
Yaad rakhe, jab tak interviewer khud se salary, bonus ya holidays ki baat na kare tab tak aap iss baare mein bilkul na bole. Iske alava uss company ke employees se bhi unki salary ke baare mein kabhi na pucche. Agar aap inn sab baaton ke baare mein khud se baat karenge toh interviewer ko yeh lag sakta hi ki aap kaam karne se zayda paiso aur holidays me interested hai aur iss wajah se aap reject bhi ho sakte hai.
10) Body language ki mistakes se bacche
Aapki body language apke baare mein bahut kuch batati hai. Bahut log anjaane mein kaafi galtiyaan kardete hai interview mein apne baithney aur baat-cheet karne ke tareeko mein.
Body language interview tips joh aapko bilkul nahi karni :
- Pairon ko na hailae
- Apne baalon se na khele
- Fingers dikhake baat na kare
- Haathon ko chest par cross karke na baithe
- Table par haath rakh ke na baithe
- Eye contact banaye rakhe
- Niche dekhkar baat na kare kyunki isse aisa lagta hai ki aap bilkul bhi confident nahi hai
- Lagatar apni watch ko na dekhe kyunki aisa karne se yeh lagega ki aapko interview khatam karne ki jaldi hai
Interview tips ke alava agar aapko job aur interview ke baare me aur jaankari chahiye jaise ki accha resume kaise banaya jaata hai, job kaise search kare, interview me kya puccha jaata hai toh in articles ko padhe.
Personality Development ke liye Click Karein
Agar aap upar diye gaye articles ko dhyan se padhe aur unme batayi gayi tips par kaam karenge toh aapke job milne ke chances bahut badh jayenge.
Interview me kapdo se bhi kuchh fark padta hai kya.