Blogging ke bare mein toh aapne kaafi suna hoga aur aape mein se jo ye padh rahe hain unmein se kayi log toh blogger banne ke taiyyari mein bhi honge. Aaj hum is blog se ke madhyam se aapko puri jankari denge ke blogging kya hai aur kaise ban sakte hain blogger.

Aap in topics pe click karke padh sakte hain –

Blogging Kya Hai?

Blogger Kitne Type ke hote hain aur kaise bane?

Blogger kitne paise kama lete hain?

Blogging kya hai?

Aaj ke time mein blogging ka kaafi chalan hai aur hoga bhi kyun nahi, kyunki ismein naam ke sath sath paise bhi banaye ja sakte hain. Agar is shabd ki baat karein toh pehle Blog ko ‘Web Log“ kaha jata tha. Wahin se blog ka naam nikal kar aya. Blogging ka matlab hota hai apne personal blog par content likhna, jaise travel blogger, fashion blogger ya lifestyle blogger etc. Aaj kaafi yuva is line mein apna career behtar banane mein lage hue hain. Blog mein log apne views likhte hain ya kisi topic par puri jankari dete hain aur usey fir padhne walon tak pahunchaya jata hai.

Present time mein blogger acchi khasi surkhiyon mein rehte hai aur khub paise bhi kamate hain. Toh ismein aap bhi apna career bana sakte hain. Lekin ismein apki creativity hona bahut jaruri hai kyunki ismein aapko aapka apna content taiyyar karna aana chaiye. Kisi aur ke content ko churane par aap kabhi kamyaab blogger nahi ban sakte hain.

Blogger kitne tarah ke hote hain aur kaise bane?

Ab chaliye baat karte hain ke blogger kitne tarah ke hote hain ya hum kin kin topics par likhkar accha blogger ban sakte hain. Toh aapko jankari ke liye bata dein ki blogger bahut prakar ke hote hain. Jismein aaj sabse jyada log interest dikha rahe hain usmein fashion blogger, travel blogger ya tech blogger ka naam aata hai. In categories ke blogger aaj kaafi lokpriyata mein hain aur acche paise kama lete hain.

Ye kuch blogger ke role hain jo in dino khub naam aur paisa kama rahe hain.

• Fashion Blogger
• Travel Blogger
• Food Blogger
• Technical Blogger
• Entertainment Blogger
• Lifestyle Blogger
• Fitness Blogger
• Sports Blogger

Fashion Blogger ke bare mein jaane

Ab hum baat karte hain ke fashion blogger kya hai aur ismein kya likha jata hai. Toh bata dein ke is topic pe jo log blog likhte hain unka topic fashion se juda hota hai. Wo kapdon, lifestyle, beauty se jude topics par article likhte hain. Ek baat aur bhi bata dein ke fashion blogger mein ladies ya girls jyada interest rakhti hain aur acchi khasi kamai bhi karti hain. Aur aaj ke daur  mein aise fashion bloggers ki kaafi jyada demand hai.

Internet par jo bhi hum in fashion se judi batein padhte hain unhe ye bloggers hi likhte hain. Niche jaanenge ke kaise ban sakte hain ek fashion blogger, toh article ko padte rahiye.

Fashion blogger kaise bane?

Aapne ye toh jaan lia ke fashion blogger kya hota hai aur wo kis prakar ke blog likhte hain. Ab ye bhi jaan lijiye ke kaise banein fashion blogger.

Sabse pehle toh aapko fashion blogger banne ke liye fashion industry mein aapko apna interest banana hoga. Agar aap fashion industry mein ya fashion se judi baton mein interest nahi rakhte honge toh aapko fashion blogging mein interest nahi aayega.

Dusri baat ye ke aap lifestyle, kapdon aur beauty ke samanon ka bhi gyaan lein. Aap acche fashion bloggers ka blog padhte rahein aur samjhein ke log kaise likhte hain.

Agar uper batayi gayi batein aap se mel khati hain toh aap likhna shuru kar sakte hain. Apna blog banana ajkal bilkul muft hai aur agar aapke blogs pe response accha mile toh bad mein aap domain bhi le sakte hain taki professional dikhein.

Travel Blogger ke bare mein jaane

Agar aapko ghumne firne ka shaukh hai toh aap travel blogger jarur ban sakte hain. Aaj is line mein kayi bade bade blogger humare bich hain aur acche paise kama rahe hain. Toh ye blog padhte rahiye taaki aap bhi ban sakein ek acche travel blogger.

Travel Blogger kaise bane

Travel blogger apni travel ki jankari ya alag alag jagahon ki jankari hum tak pahunchte hain. Travel blogging vakai ek bahut accha topic hai lekin ismein aapko travelling se judi baton ka gyaan bhi hona chaiye. Kuch log aise bhi hain jo acchi khasi naukri chhod kar bhi blogger bante hain. Iske liye aap dusron ke blog padhein aur likhne ki practice karein aur apni chhoti se chhoti travel story ke bare mein bhi logon ko btayein.

Ek bar fir in baton ka dhyaan rakhein

• Travel karne ka shaukh rakhein
• Alag alag jagah jayein aur likhna shuru karein
• Padhne walon ko dhyaan mein rakhte hue blog likhein.
• Kisi aur ka content na churayein.

Food Blogger ke bare mein jaane

Food blogger bhi ek accha vikalp hai. Jin logon ko khane mein interest hota hai wo food blogger ban sakte hain. Food blogging mein aaj kayi bade bade bloggers saamne aye hain. Food bloggers wo hote hain jo ki khane peene se judi batein ya kisi specific khane ki chiz par apna view likhte hain.

Aapne bhi kayi bar khane ki chizon ke bare mein ya fir kisi recipe ke bare mein Google par dhunda hoga aur unke bare mein jankari li hogi. Wo sab food blogger ya food writer hi likhte hain. Iske alawa ajkal food vlogger bhi bahut hain jo Video ke jariye apni baat aap tak pahunchate hain.

Kaise bane Food Blogger

Aap bhi ek famous food blogger ban sakte hain. Iske liye aapko sabse pehle khane peene ki chizon se lekar recipe ke bare mein jankari leni hogi. Kyunki aapko khane peeney ki chizon ke bare mein hi likhna hai toh uski acchi jankari hona jaruri hai.

Iske alawa aap shuruwat mein thoda thoda likhna shuru karein aur apne likhne ke tarike ko sudharein. Jaise jaise aap likhna shuru karenge aapki ruchi badhti chali jayegi aur log bhi aapke likhne ke tarike ko pasand karne lagenge. Iske sath sath aap famous food bloggers ke blogs ko padhein aur unse sikh lein.

Technical Blogger kaun hote hain

Technical Blogger ek behtareen blogging category hai. Toh ayiye jaane hain Technical blogger kon hote hain. Technical bloggers wo hote hain jo technical chizon ke bare mein yani naye purane mobile phone, koi gadget, koi nayi device, TV, nayi technologies, ya softwares ke bare mein aapko jankari dete hain. Kayi technology lovers ajkal video ke dwara bhi vlogging karke aapko technical chizon ki jankari dete hain. Technical Blogging ya Vlogging dono se hi aap acchi kamayi kar sakte hain.

Kaise bane technical blogger

Chaliye ab jante hain ke technical blogger kaise ban sakte hain aur iske liye kya karna padega. Technical blogger wahi ban sakta hai jo jiski technology aur gadgets aur softwares mein interest ho. Technical blogger banne ke liye aur technology ke bare mein jankari rakhne ke liye aapko technical knowledge ikattha karni hogi. Iske liye aap acche tech bloggers ke blogs padhein aur vlogs dekhein.

Iske baad koi bhi aasan sa topic utha kar uske bare mein likhein. Likhte likhte aapko idea lag jayega ke kaisi content logon ko pasand aarai hai aur aapki writing skills bhi improve ho jayegi.

Technical writer banne ka sabse bada fayeda hai ki..

Aapko badi badi companies se offers aa sakta hai ke aap unke products ka prachar karein. Aksar dekha gaya hai le kayi badi badi websites apne saaman ke advertisement ke liye bloggers aur vloggers ki madad leti hai taki unka product logon tak aasani se pahunch sake. Iske liye kaafi paise milte hain aur aapka naam bhi hoga.

Entertainment Blogger

Ab baat karte hain entertainment blogging ki. Agar aap bollywood, serials, ya hollywood films ka shaukh rakhte hain toh entertainment blogger bankar naam raushan kar sakte hain. Aaj har din bollywood par kayi badi badi khabarein chhapti hain aur khub bollywood masala dekhne ko milta hai. Isiliye bollywood ke bare mein likhna aapko kaafi fayeda de sakta hai.

Entertainment blogger wo hote hain jo bollywood ki news ke bare mein acchi batein ya unke uper apni views dete hain. Iske alawa bhi entertainment blogging mein likhne ke liye kaafi masala hota hai.

Entertainment blogger kaise bane

Agar aapko ek accha blogger banna hai toh aapko sabse pehle bollywood ki saari khabron ke bare mein padhhna hoga. Toh aapko jarurat hai ke aap alag alag websites aur online magazines se bollywood ki saari khabarein padhein. Iske alawa entertainment blogger banne ke liye aapka interest bhi films ya serials mein hona chaiye.

Iske alawa aapko bollywood ki hastiyon ko bhi follow karna hoga taki aap unke bare mein bhi likh sakein. Entertainment blogger banne ke liye aapko sabse jyada madad milegi naye films ko dekhkar unka review nikalne par.

Lifestyle Blogger

Ab padhte hain lifestyle blogger ke bare mein. Lifestyle category mein bhi aaj kaafi bloggers hain jo acche acche content dekar khub paisa kama rahe hain. Is tarike ke bloggers apne life style ke bare mein likhte hain. India mein kayi bade bade blogger hain jo apni life style pe likhte hain. Agar aap bhi ek safal lifestyle blogger banna chahte hain toh apni life style ke bare mein explore karna shuru karein.

Kaise bane lifestyle blogger

Lifestyle blogging ek different tarah ka blogging way hai. Lifestyle ke blogger wahi bante hain jo day to day life ke bare mein likhte hain. Example ke taur pe lifestyle bloggers apne ghar ko saaf rakhne ke tips, social meida se juda koi topic ya apne bare mein likh sakte hain jo ki unki life se judi har din ki story ho sakti hai.
Yani likhne ke liye kaayi sari chizen ho sakti hai bas aapko ye sochna hai ke log kis bare mein padhna jyada pasand karenge. Agar aap bhi apne bare mein logon ko batana chahte hain ya life se judi koi interesting baat apne audience tak share karna chahte hai toh aapko bhi lifestyle blogger banna chaiye. Is category mein log ajkal videos bhi bana rahe hain jisey Vlogging kehte hain.

Fitness Blogger

Ab janenge hum fitness blogger ke bare mein. Toh chaliye jante hain fitness blogger kon hote hain. Fitness blogger wo hote hain jo ki aapse body ya mental fitness se judi batein share karte hain jaise ke kaise aap apna mental ya body health accha rakh sakte hain. Fitness bloggers aapse khane peene ke habits se lekar, exercises ya good habits ke bare mein discuss karenge. Agar aap bhi fitness enthusiast hain toh ap bhi ek behtareen fitness blogger ban sakte hain

Aise bane fitness blogger

Agar aap bhi ek safal fitness blogger banna chahte hain toh in baton ka dhyaan rakhein. Toh har blogger ki tarah aapko bhi dher saari fitness blogging websites aur content padhna hoga. Accha content padhein, fitness se judi videos bhi dekhein aur likhne ke tarike ko pehchanein. Tabhi aap bhi apni likhawat sudhar sakte hain aur acche blogger ban sakte hain.

Aaj kayi saare fitness bloggers hain jo ki behtareen content lekar aate hain aur appreciation ke hakdar hain. Aap ye bhi taye kar lein ke apka fitness mein interest hai ya nahi. Jab aap padhna aur is topic se judi baton ko janna shuru karenge aapko apne aap hi pata chal jayega ke ye topic aapke interest ka hai ya nahi.

Sports Blogger

Jo log khel mein ruchi rakhte hain aur khel se judi har jankari mein updated rehte hain wo is career option ko chun sakte hain. Toh aap samajh hi gaye honge ke sports bloggers kis ciz ke bare mein likhte hain.

Aagr aap khel ke shaukeen hain jaise Cricket, Football, Tennis, Baseball etc toh aap bhi ek sports bloggers ban sakte hain. Ab karna wahi hai ke aapko sports se judi har ek khabar ke bare mein updated rehna hai. Khel India ka bhi ho sakta hai ya bahar ke desh ka.

Kaise bane sports blogger

Sports blogger banne ka bhi wahi tarika hai jaise baki blogging ka. Aapko har din sports se judi baton pe updated rehna hoga. Har din sports news, articles, famous sports blogs ya vlogs dekhein aur unke likhne ya video bananne ke tarike ko notice karein. Jaise hi aap samajh jayenge ke sports ke bare mein kaise likhein taki log aapke blog ko padhne mein interest lein.

Ek bar fir in baton par dhyaan dein taki aap acche blogger ban payein –

• Dusre famous bloggers ke blog padhein.
• Thoda thoda likhna shuru karein.
• Apni bhasha mein pakad banayein.
• Logon ke interest ko samjhein.

Kitne paise kamate hain Bloggers

Aap kisi bhi category mein blogger ban sakte hain bas aapka interest hona chaiye aur likhna aana chaiye. Aapki kamayi nirbhar karti hai ke aapke content ko padhne mein log kitna interest le rahe hain. Jitni jyada views aapko apke blog par milegi utni hi jyada aapki kamayi hogi. Aap apne blog par advertisement bhi kar sakte hain aur kamayi kar sakte hain, par uske liye pehle aapko apne blog par dher sare logon ko lekar aana hoga.