Bakery Business Plan In Hindi

Dosto, naste ki table par bread butter ho ya kisi khaas occasion par cake pastry. Bakery products hamesha se hi har ghar ki jarurt rahe hai. Sirf ghar ki hi nahi balki desh ki bhi. Kya aap jante hai? India biscuit ke production mein world mein 2nd position hold karta hai sath hi processed food sector ke revenue generation mein bakery industry 3rd position hold karti hai. Jisse saaf jahir hota hai ki bakery products ki demand din per din badhti ja rahi hai aur badhte ja rahe hai bakery mein business ke avsaar. Aap ghar baithe bhi bakery business chala sakte hai. Chaliye bakery business plan se jude sari baatein jante hai.

Source: India home to burgeoning bakery sector -AMEFT

Iss article mein hum aapko batayenge-

Bakery business kya hota hai

Bakery business chalne ke liye yogyata

Bakery ke liye location aur market research

Bakery product aur pricing

Kanuni prakriya (License & Registration)

Bakery business ke liye laagat aur punji

Bakery business mein munafa

Bakery ke liye marketing ke tareeke

Online delivery system ki jaankari

Bakery business badhane ke tareeke

Bakery business ke liye tips

Bakery business se jude kuch sawaal

Bakery business kya hota hai

Wo jagah jaha biscuit, cake, pastry aur bread ityadi banayi ya bechi jati hai usse bakery kahte hai. Yaha par har cheez bake (sekna) karke banayi jaati hai isliye iss business ko bakery business kehte hai. Bakery business kayi prakar se chalaya ja sakta hai jaise:

1. Home service or online service
Gharelu mahilaye jo ghar mein hi bakery business shuru karna chahte hai ye iss prakar ka bakery business hai. Ismein aap ghar baithe hi business chala sakte hai. Jismein app online website ke dwara order lekar apna product logon tak pahuncha sakte hai.

2. Counter service
Iss type ke bakery business mein aapko commercial space chahiye hota hai jahan se customer aakar aapna manchaha food product le ja sake.

3. Dine In service
Iss type ke bakery business me customer ke liye baithne aur khane ki bhi suvidha hoti hai.

Bakery business chalane ke liye yogyata

Bakery business chalane ke liye aapko baking ke liye passionate hona chahiye saath hi saath food ingredients ki sahi jaanakari aur creative hona padta hai par pareshan hone ki jarurat nahin hai agar aap inmein se koi bhi baat nahin jaante kyonki aise bahut se online aur offline professional course aur training available hai jo baking related baatein professionally sikhate hai.

Chaliye available course aur training ki eligibility, course time, fees ityadi jaante hai:

• Diploma courses

• Certificate courses

Kuch aur bakery courses jo aap kar sakte hai:

• BVoc in Bakery and Cookery
• BSc in Culinary Arts with specialisation in Bakery & Pastry Art Management
• Online Baking Courses and Learning Programs
• Online Pastry Chef Courses, Classes and Training Programs
• Online Pastry Chef Courses, Classes and Training Programs

To iss tarah se aap inn courses mein admission lekar ek professional baker ban sakte hai. Jyada jaankari ke liye yahan click karein.

Bakery ke liye location aur market research

Agar aap koi commercial place lene ka soch rahe hai bakery kholne ke liye to location decide karte time market research jarur kare. Market research apne location ke aass paas ki market ke bare me jankari lena hota hai.

Aap ye try kare ki shop aap apne khud ki jagah par hi khole to rent cost nahi aayega jisse total investment kam aaayegi. Aagr aap place rent par lene ka soch rahe hai to ye jarur decide kar le ki rent kitne tak hona chaiye. Kisi bhi business ko successfully run karne ke liye marketing se jyada location ko sahi se decide krna jaruri hota jo ki market research par depend karti hai.

Jaise jis place par aap bakery kholne ja rahe hai waha kitni aur bakery hai?uss place par kitni footfall( per day kitne log aate hai ) hote hai per day? Waha ki public kase hai like jaha middle age ke log jyada aayenge waha bakery chalne ke jyada chances hai. Kuch aise baate jo location decide karne ke liye market research me aapko dhyan rakhna chaiye wo hai:

• Bakery business aap jis place par run karenge wo aapki khud hogi ya rented hogi? agar rented hai to ye try kare ki rent Rs.15,000-20,000 se jyada na ho nahi to aapki total investment badh jayegi.
• Aapki bakery ki area me footfall( per day kitne log aate hai ) kitni hai per day?Location market area me hai ya nahi.Bakery kis floor par hai jaise ground floor ya first floor par kyonki ground floor easy hota hai access karne ke liye to footfall( per day jitne log aate hai) jyada hogi.
• Bakery agar mall, college, school, office ke aas pass hogi to  footfall(per day
• kitne log aate hai) bhi jayada hone ke chances hai. Dekhe aapke area me koi aur bakery hai ya nahi. Aagr bakery hai to kitne distance par hai uska aapke bakery business par kitna aasar padega.

Display and packaging par khass dhyan de:

Bakery business ek aisa business hota hai jaha customer displayed product ko dekh kar decision lete hai chahe wo online website par ho ya display bakery case me bakery par. Display bakery case mostly bakeries me dkhene ko milta hai.

Online display ke liye products ki achi photos le kar website par dale, aap uski clips bana kar bhi apni website me daal sakte hai, customer impact badhega. Packaging ke liye aap ready made packets ka use kar sakte hai par wo sahi se binded aur thoda hard hona chaiye jisse soft material ke kharab hone ke chance kam ho jayenge. Inn boxes ki price approx. Rs.3/box hoti hai jo ki hard page ke bane hote hai.

Bakery product aur pricing

Bakery products me kaafi types ke product aate hai jaise cake, pastry, bread, cream roll, biscuit etc aur uske bhi different types hote hai like red velvet cake, vanilla cake, Chocolate cake , white bread, brown bread etc. Isliye menu decide krna jaruri hota hai, aap apne bakery ka menu decide karte time apne customer consumption, investment aur market  ka dhyan rakhe.

Aap ye bhi dhyan me rakhe ki aap rooted recipe(phele se define ) sell karenge ya koi naye recipe innovate krne ka try karenge ya purani recipe me naya flavour dalenge. Aap product ka customization bhi  kar sakte hai jaise log diiferent occasions ke liye like shaadi, birthday, farewell ke liye different type ka product chahte hai jisse aapki sell badh sakte hai.

Menu me products ke sath sath price ka bhi important role hota hai isliye product ki pricing karte time customer ko dhyan me rakhe. As aapka bakery business new hoga to price kam rakhe to customer attract honge aur price decide karte time market research sahi se kar le aur inn baato ka dhyan de. Aap jaise same product ki kya minimum aur maximum costing hai. Customization ka kya cost hai market me.

Kanuni prakriya(License aur Registration)

India mein kisi bhi business yani koi shop kholne ke liye aapko kayi sari registration aur license processes se gujrna padta hai. Agar bakery business ki baat ki jaaye toh aapko pehle toh apne business ka registration, GST registration karna padta hai aur food license, health trade license lena padta hai. Aage vistar se jante hain ki ye registration/license kya hain aur kaise paya ja sakta hai.

Registration ki prakriya:

Hum ek chote budget ki bakery ki baat kar rahe hai jiske liye aapko mukhyata 2 registration karne padte hai-

1)Bakery ke liye Shop Registration karaye:

Agar aap apne state mein koi dukan ya business shuru karte hain toh aapko state government ke labour department mein Shop & Establishment Act ke under Shop ka registration karana hoga. Ye registrations online kiya ja sakta hai aur registration ke liye aapko us state ke repective labour department ki website pe jaaker Shop registration karana hoga.

Registration ke liye kuch information ki jarurat hoti hai jaise:

1. Shop ka naam
2. Shop ka address
3. Manager ka naam
4. Kis tarah ki shop hai, jaise, electronic, beauty parlour etc.
5. Kitne employees kaam karenge

Yahan hum kam laagat mein bakery business shuru karne ki baat kar rahe hain, isiliye aaj hum registration ke bare mein hi janenge.

Registration ke liye ye zaruri documents chahiye:

1. PAN / Aadhar Card / Driving License/ Voter Id
2. Photo of Owner
3. Rent Agreement, if Rented
4. Electricity Bill

2) GST Registration

Jab bhi India mein koi product ya kisi service ko business ke through dia jata hai toh uska GST(Goods and services tax) registration karana hota hai. GST registration central govt. Ke under aata hai. GST ke under aap apne business ko register kara kar tax ke process ko pura kar sakte hain jo ki mandatory hai.

Required documents for registration:

1. Aapka PAN Card.
2. Business Registration ka proof.
3. ID & Address proof(photograph ke saath).
4. Aapke business ka address proof.
5. Bank Account Statement.
6. Digital Signature.

Yah ek easy aur jaruri process hai. GST registration aap govt. Dwara provided official website se bhi kar sakte hai ya fir kisi private organization se bhi help le sakte hain. Govt. dwara provided website hai – Official GST Website. Iske alawa private organization jaise IndiaFilings pe jaakar bhi aap GST registration karwa sakte hain.

GST Registration ki puri jaankari ke liye padhein humara blog GST Registration Kaise Kare

Bakery ke liye License

Bakery business chalne ke liye aapko sarkar ke dwara diye jane wale kuch license ki jarurat padti jo yeh assure karte hai ki aap sarkar ke dwara bataye gaye rules aur standards ko follow karte hue business chala rahe hai. Jiske liye aapko kanuni prakriyao se guzarna padta hai. Chote budget ke Bakery business ke liye mukhyata 2 license ki jaruri hote hai jo ki iss prakar hai:

1)FSSAI License

FSSAI license ko ‘food license’ ke naam se bhi jana jata hai. Yah license kisi bhi food related business ko india mein chalne ke liye mandatory hai kyonki ye license assure karta hai ki aapka food product jo aap banate hai ya sell karte hai wo unn food standards ko satisfy karta hai jo bharat sarkar dwara nirdharit kiye gye hai. Ismein 14 digit ka unique registration number milta hai manufacture ya trader ko jo ki food package par print hona mandatory hai.

Aapko aapne annual turnover ke according apni category decide karne hoti hai aur usse category ke anusar form A ya form B bharna hota hai.

Registration ke liye ye jaruri documents:

• Photo of Food Business Operator
• Document for Identity Proof like Ration Card, Voter ID Card, PAN Card, Driving License, Passport, Aadhar Card, Senior Citizen Card, Department Issued ID
• Supporting Documents (if any): NOC by Municipality/Panchayat, Health NOC

Registration ka process

• Step1:Application form fill kare yahan click karein
• Step2:Sare required documents upload karein.
• Step3:Upar bataye hue documents  submit karne ke baad, govt ke dwara aapke food product ka inspection hota hai.

Successful inspection ke baad FSSAI licences, department ke dwara issue kiya jayega. Ye license aap kisi private agency ke through ya online government website par bhi jakar khud bhi bana sakte hai.

NOTE: Food licences 1 se 5 saal tak ke liye liya jata hai jo aapko renew karna hota hai license expiry date ke 30 din phele tak.

FSSAI License ki puri jaankari ke liye padhein humara blog FSSAI License kaise le?

2) Health trade license

Jab aap koi aisa business run karte hai jiska direct asaar public health par hota hai tab ye license lena mandatory hota hai. Health trade license local civil authority jaise rajya municipal corporation ya health department ke dwara provide kiya jata hai. Jis ke liye aap online bhi apply kar sakte hai.

Jaruri documents:

• Sanction and Completion (Includes
• Ownership Proof, rent Agreement or NOC from Landlord)
• Three Copies Of The Site Plan and Layout
• Indemnity Bond Of INR 100
• Structural Stability Certification
• Signed By Structural Engineer
• Power And Water Paid Bill
• Sewer Connection Proof
• Water Testing Reports
• Plan Of The Premises
• Medical Certificates Of The Employees
• Proof Of Property Tax
• Lal Dora Certificate, If Applicable

Iske liye aap state municipal corporation ki website par ja kar ya CSB(citizen’s service bureau) par jakar apply kar sakte hai.

adhik jaankari ke liye yahan click karein

Aagr aap counter service ya dine in bakery kholte hai to upar bataye hue registration aur license ke sath sath 2 aur license ki jarurat padegi.

1)Fire license

Jab aap dine in bakery ki suvidha denge aapni bakery me customer ko to iss license ki jarurt padegi . Ye license assure karta ki aapka customer aapki bakery me fire hazard se safe hai. Iske liye aapko No Objection Certificate(NOC) fire department se chaiye hota hai. NOC ke liye aapko state fire deparment me apply krna padta hai.

2)Eating House License

Jab diiferent types ke food customer ko consumption ke liye serve kiye jate hai tab ye license chaiye hota hai. Jo city ka licensing police commissioner provide karta hai.

Jaruri documents:

• Eating House ka Site Plan. Eating House ka Postcard size photographs.
• Valid Trade License ki copy se NDMC/MCD/DCB/Airport Authority India fee receipt ke sath.
• Legal occupancy proof Eating House ka legal occupancy proof aur rented bakery ke case me landlord se NOC.
• Applicant ka Identity aur Residential Address Proof.Affidavit Notary Public ke dwara attested.
• Fire safety certificate(aagr seating capacity 50 se jyada hai).Board Resolution ki copy.
• GST Registration Certificate.
• FSSAI License.
• Employees ki details.
• Police Clearance ka Certificate.
• Fire Safety measures installation ka proof

Bakery business ke liye laagat aur punji

Ek proper bakery business chalane ke liye kafi factors important hote hai aur total investment unhi factors par depend karta hai jaise aap bakery apne ghar par kholenge ya koi commercial space lenge, equipment kon kon se use karenge, raw material kon se use karenge, manpower(staff) kon kon se lagenge iske sath hi water, electricity bill, transportation, storage, marketing aur license etc par investment.

Bakery Equipment/Machine

Bakery chalne ke liye aapko kafi equipments ki need hoti hai jaise commercial oven, mixer, measuring pan etc. Aaye jante hai kuch basic equipments list aur unki price kya hongi:

Raw material

Bakery business chalne ke liye bakery ke liye passionet hone ke sath food ingredients ki sahi jankari hona bhi jaruri hai aur inn par total investment bhi depend karte hai. Aap raw material apne area ke retail shop ya whole sale market se bhi le sakte jo sasta padega jisse aapki investment kam aayegi.

Bakery products like cake, pastry, bread etc ke liye kuch aise basic product hote hai jo har product ko banana me kaam aate hai. Ek chote budget ki bakery start karne ke liye kuch basic product ki list, quantity aur price jante hai-

Ek small budget ki online bakery chalane ke liye machine, raw material, infrastructure, license , water and electricity bill, transportation, marketing etc ka total milakar Rs.50,000 se Rs.70,000 tak ke minimum punji me aap online bakery business khol sakte hai.

Kuch basic product ke alwa aap extra level ke product bhi use kar sakte hai customize product etc k liye. Jaise bar chocolate, chocolate chips, lemon extract, Cake flour, Shortening.

Counter service aur dine in bakery kholne ke liye aapko inke saath saath infrastucture aur manpower ki bhi jarurat padegi-

Bakery ka Infrastucture

Iss type ke bakery business me infrastructure ka ek important role hota hai. Ek chote budget ki bakery start karne ke liye humein kam Furnitures Ki jarurat padte hai. Ab baat karte hai kon kon se important furniture aur kitne pasie lagega-

Bakery ke liye staff

Bakery business chalane ke liye  aap pahle ye decide kare ki aap akele manage kar sakte hai ya aapko helping hand ki jarurat padegi? kitne employees aap rakh sakte hai? unki income kya hogi? agar customer ko aapke employee attend kare toh ye assure kare ki aapke employee ki communication skill achhi ho, wo sahi way se customer se baat kare kyonki aagr customer ko aapki hospitality ache lagegi to wah jarur wapas aayega. As a new comer, employees ko employee karte waqt kuch baato ka dhyan rakhe-

• Number of employee jyada na rakhe, employee kam ho par ache ho. Jo employee customer se contact kare uski communication skill achi ho, jaise customer aapki hospitality se khush ho kar dobara aaye.
• Aap employee ko pay apne customer base and punji ko dhyan me rakhte hue kare.
• Bakery business chalne ke liye manpower(staff) bhi chaiye hote hai par ye aap par depend karta hai ki aapko kitne manpower ki jarurt hai.

Chaliye kuch basic staff ki list aur cost ke baare mein jante hai

Aap counter service aur dine in service ki suvidha wali bakery staff, infrastructure, electricity aur water bill, transportation milakar Rs.1,30,000-2,00,000 tak ki investment me khol sakte hai .

Rented bakery ke case me ek chote city me rent 15,000-20,000 tak padega. Iske alawa apne area mein agar aapko shop purchase karni ho ya fir rent par lena ho toh aap niche diye gaye websites pe jaker cost aur rent pata kar sakte hain. Issey aapko License fee aur stock ke sath sath infrastructure cost ka bhi andaza lag jayega.

• Magic Bricks
• 99Acres.com
• OLX

Note: Aap second hand machines bhi purchase kar sakte hai isse aap ki costing kam aayegi. Iske alwa aap apne bakery ko modify kar sakte hai aur kuch next level machines use kar sakte hai jaise Heavy duty food processor/chopper, A turnover machine, Slicers, Shelving , commercial space le sakte hai par isse aapki total investment badh jayega

Investment ke liye aap in 3 tarikon mein se koi bhi choose kar sakte hain –

1. Personal Investment – Personal investment yani apne hi paison ko apne bakery business ke liye invest karna sabse best option hota hai. Karan, issey apko loan lene ki jarurat nahi padegi jo ki aapko future mein wapis pay karna hoga. Iske alawa, agar future mein kisi aur se investment karani pad jaye, toh aapki khud se ki gayi investment aapke investor ke liye ek trust point ban jayega ke aap apne business ke bare mein serious hain.

2. Bank Loan – Bank loans kisi bhi small ya medium sized business ke liye kaafi important role play karta hai. Agar aapke pas apna khud ka investment nahi hai toh aap bank se loan sanction karwa sakte hain. Bank se loan sanction karwane ke liye aapko kuch chizon ki requirements hongi jaise:

• Aapki age limit 21-65 years ki honi chahiyeAapko ek profit margin dikhani hogi jo bank ko trust provide karega.
• Profit kam se kam 1,50,000 INR ki honi chaiye.
• Ek proper business plan dikhana hoga jo ki loan provider ko aapke business ke bare mein puri jankari de sake

Finance mein ek aur kaafi important factor hota hai aapke bakery ke insurance ka. India mein log insurance pe jyada dhyaan nahi dete hain, jabki aapko kabhi kisi bhi nuksaan, jaise chori ya koi accident, se bachane ke liye bakery ki insurance karwana kaafi jaruri hai. Insurance ke liye bhi aapko kisi insurance company se contact karna hoga.

Business ke liye loan kaise le jyada jaankari ke liye padhein humara blog Business Ke Liye Loan In Hindi

Bakery business me munafa

Bakery business me munafa ka andaza aap iss baat se laga sakte hai ki bakery industry india me 3rd largest reveune generating processed food industry hai. Bakery products me aapko 25-30% tak ki margin milti hai. Jaise aagr aapko cake banane me total cost 200 aaye to aap cake ko 25% margin par yani 250 rs me sell kar sakte hai market ke according. Biscuit aur bread me to 40-50% ki bhi margin hoti hai aur innki selling ke liye jyada effort bhi nahi lagna padta kyonki ye daily use ke product hai. Iss hisab se aap ek month  me bakery business se 8,000 se 15,000rs (approx) tak earn kar sakte hai.  

Bakery business mein 30% se 50% tak munafa ho sakta hai.

Bakery ke liye Marketing

Logon ko aapne bakery business ke bare me batane ke liye marketing ek acha medium hai. Bas aap ko decide karna hota hai ki aapke product par kon si marketing sahi rahegi aapke customer response ke according, Iske liye aap ek market research karke logon se puch sakte hai ki unhe kisi bakery ya shop ke bare me kase pata chala online ya pamphlets se ya kisi friends se. Marketing 2 type ki hoti hai: offline and online marketing

1. Offline marketing

offline marketing pamphlets, holding ke through hoti hai. Pamphlets ki cost approx. 1000 rs tak aayegi aur holding ka cost approx 5000rs padega. Offline marketing aaj ke time par costly aur kam effective ho gye hai.

2. Online marketing

Social media ke time par online marketing ka effect badhta ja raha. Online marketing se aap jayada se jyada log tak apne bakery business ko paucha sakte hai wo bhi minimum costing par. Aap coupon code ke through discount de kar bhi promotion kar sakte hai.Bakery ki online marketing ke kuch aur tareeke:

Google My Business – Google My Business Google ke taraf se ek free tool hai jissey aap apne bakery business ko Google ki listing mein daal sakte hain. Iska fayeda ye hai ke jab bhi koi Google pe search karega ke aas pas bakery kahan hai ya fir sidha aapke naam se apki dukan dhundna chahega toh usey bhot aasani se apki shop ka sara detail Google par mil jayega.

Google My Business apke bakery ka naam, bakery tak pahunchne ka direction, Phone number, Reviews, Ratings, images aur details sab kuch ek hi jagah par apke customer tak pahuncha dega. Iske alawa agar koi kisi area mein apne aas pas ladies bakery dhund raha hai aur apka parlour us area ke range mein aarai hai toh aapke shop ka naam aur detail bhi Google ki list mein ajayega. Issey aasani se apke bakery ko koi bhi online dhund sakta hai.

Google My Business mein account banana kaafi aasan hai. Niche diye gaye image ke steps ko follow karke aap aasani se apna account bana sakte hain –

Google My Business ki jyada jankari ke liye yahan click karein

Just Dial: Just Dial ek esa platform hai jo ki kisi bhi area ke local businesses ki information provide karta hai jo ki aapko ya toh internet ke madhyan se aapko milegi ya fir call ke through pata chalegi.

Just Dial mein bhi Google My Business ki tarah aapko apna bakery busniess register karna hoga. Antar bas itna hai ke Just Dial mein aap do tarah ki listing kara sakte hain – Free listing ya fir Paid Listing.

Registration ka process kaafi simple hota hai aur ye aap online unki website se kara sakte hain ya fir aap 8888888888 pe call karke bhi registration kara sakte hain. Just Dial mein free listing karane ke liye yahan click karein – Just Dial Free Listing aur paid listing karane ke liye yahan click karein – Just Dial Paid Listing.

Website: Aap apni bakery ki website bana kar jiska cost approx. Rs. 1,000 lagega promotion kar sakte hai. Aap usko update karte rahe aur uske through aap order bhi le sakte hai. Bakery website ka sample dekhne ke liye yahan click karein.

Social Media: Iske alwa aap facebook, instagram page bhi bana sakte hai ,ad ke through bhi aap online marketing kar sakte hai.

Online delivery system ki jaankari

Online order lene aur delivery karne ke liye aap inn app par register karein jaise zomato, food panda, swiggy, uber eats par apne bakery shop ko register kara sakte hai jisse na kewal aap ki selling badhegi sath hi sath promotion bhi hoga.

Delivery karte time ye dhyan rakhe ki aapke product ki quality me koi decrement na aaye nahi to negative publicity bhi ho sakte hai. Iske alwa aap flower shop, mini restaurant ke sath bhi collaborate kar sakte hai as log flower ke sath cake bhi lete hai special occasion par jisse app dono ka phyada aur promotion ho jayega .

a) Zomato par register karein. Puri jaankari ke liye yahan click karein.

b) Ubereats par register karein. Puri jaankari ke liye yahan click karein

c)Swiggy par register karein. Puri jaankari ke liye yahan click karein

d) foodpanda par register karein. Puri jaankari ke liye yahan click karein

Bakery business badhane ke tareeke:

Bakery business me avasar din partidin badhate ja rahe hai. Aap apne business me munafe ko dekhte hue apne bakery business ko expand kar sakte hai ek hi city ke different location par ya franchise bhi khol sakte hai different cities me .  

Bakery business ke liye tips–

• Customer response ke according recipe choose kare, experiment karte rahe.
• Hygiene ka khaas khyal rakhe, Apni website par product manufacturing ki clips banakar daale, jisse customer ko cleanliness dikhyegi.
• Jyada footfall wale jagah par bakery khole.
• Party, office aur college function me bakery product cater bhi kar sakte hai.
• Customer hospitality ka khaas dhayan rakhe, consistent customer par jyada dhyan de.
• Product quality maintain rakhe, customer believe increase hoga. Special offer , discount  chalet rahe, promotion aur selling dono hogi.
• Aap kuch alag jaise midnight delivery ka option bhi rakh sakte hai isse aap ki selling badh jayegi kyuki raat me mostly bakery close(band) hoti hai.
• Raw material ko sahi se store karna bhi jaruri hai nahi to ye material kharab ho sakte aur aapka loss ho jayega. Iske liye storage box ki jarurt padti hai jo ki different size aur price ki hoti hai.
• Aap different material ke box use kar sakte hai jaise plastic, steel. Aap steel box use kar sakte hai kyonki iska human health par koi side effect nahi hota hai par ye box airtight hona chaiye aur cool jagah par store karna chaiye.
• Bakery website par aap recipe bhi daal sakte hai isse customer attract honge.

Bakery business se jude kuch sawaal

Q.1) Vegetarian bakery kaise khole?

Ans. Normal bakery jaise aap vegetarian bakery bhi khol sakte hai bas Jin recipe me aap egg use karte hai aap usme uske substitute use kar sakte hai jaise butter, milk, baking soda aur flax seed etc

 Q.2) Training kaha leni padegi aur kya wo free of charge hogi?

Ans. Aap training kisi institute se ya online bhi le sakte par wo free of charge nahi hogi. Jyada jankari ke liye yahan click karein .

Q.3) Ek bakery business acha kase bante hai?

Ans. Aapka product, bakery business me bakery product sabse important role play karta hai. Isliye bakery products ki quality aur hygiene ka khaas dhayan rakhe.

Q4)Aisa kaun sa course kare jisse sari bakery product related information mil jaye?

Ans. Bakery and confectionery course, ye course aap kisi bhi institute se 1 year se 18 month tak me kar sakte hai.

Humein umeed hai iss business plan se aapko samajh agaya hoga ki kaise aap ek bakery business shuru kar sakte hain. Agar aapke mann mein iske alawa aur bhi koi sawal hai toh comment karke humse jarur pucchein.