Har saal ki tarah is saal bhi Central Board of Secondary Education (CBSE)/ Indian Certificate of Secondary Education (ICSE) ki pariksha aane wali hai. February aur March mein CBSE aur ICSE, 10th aur 12th ki board ki pariskha conduct karwayegi.
Jaise jaise exam ka time pas arha hai, CBSE aur ICSE ke students puri jor shor se taiyari mein lag gaye honge aur sath sath bhot hi jyada stress mein bhi honge. Aise crucial time mein ye jaruri hai ke students apne samaye ka sahi tarike se istemaal karein aur apni taiyari ke liye ek plan bana lein.
Isiliye is article mein hum picchle kayi saalon ke toppers aur experts ke dwara diye gaye tips aur best advice lekar aye hain jissey aapko exam ki taiyyari karne mein kaafi madad milegi.
Toh ayiye padhte hain top 8 tips jinki madad se aap asani se board exams ki taiyari kar sakte hain aur acche marks score kar sakte hain –
1. Behtar preparation ka key mantra – Purane Papers solve karein
Aksar dekha gaya hai ke students purane papers ko solve karne mein kam interest lete hain jabki exam mein acche marks score karne ka behtareen mantra hai purane papers solve karna. Purane papers solve karne ke tin fayede hain.
- Pehla, Practice se aapka kaam nikharta hai aur isilye aap jitni jyada purane question papers ko solve karte hain, aapki taiyyari utni hi improve hoti hai.
- Dusra, purane papers ko solve karte waqt agar aap aisa sochte hain ke aap exam hall mein paper solve kar rahe hain toh aapki speed aur concentration dono improve hota hai jo aagey jaker aapki bhot madad karega.
- Tisra aur sabse important, purane papers mein aksar saare sawal repeated hote hain aur wo wahi sawal hote hain jo syllabus ke sabse important sections se pucche jate hain. Issey aapko ye andaza lag jata hai ke sawal banane wale aapse kis tarike ka aur syllabus mein kahan se sawal pucch sakte hain.
Weak area pe jyada dhyaan dein
Ye jaruri nahi ke agar aap ek subject mein kaafi acchi knowledge rakhte hain toh har subject mein acche honge. Aise mein ye bhot jaruri hai ke aap apne weak subjects pe extra dhyaan dein taki wo particular subjects aapke overall marks pe asar na karein. Aur ye proven fact hai ke kamjor subjects ki taiyyari agar purane papers ko solve karke aur sample papers ko solve karke kia jaye toh tayiyyari jaldi aur acchi hogi.
3. Main Syllabus book hi hai sabse important
Hum mein se jyadatar exam ki taiyyari ke liye reference books ki madad lete hain jo ki kisi bhi subject ko samajhne mein madad milti hai. Magar ye na bhulein ke har ek topic jo reference books mein aap padhte hain wo aapke main syllabus book se li jati hai. Experts ki maanein, toh acchi taiyyari ke liye main syllabus books se preparation karna behtar hota hai. Ek bar jab aap main syllabus book se preparation kar lein uske bad hi reference books ki madad lein.
4. Time management Karega Aapka exam ka rasta aasan
Agar aapne exam mein score karne ke liye ek goal taye kar lia hai toh agla step hota hai us goal tak pahunchne ka sahi tarika. Exam mein overall accha score karne ke liye har ek subject ki taiyyari jaruri hai aur isilye har subject ko equal time dena bhi jaruri hai. Taiyyari ki shuruwat se hi ek schedule bana lein aur usey follow karein. Aur ye jaruri nahi ke har kisi ka schedule same ho. Padhai us tarike se karein jo aapko suit kare.
Agar assani se rakhna hai sab yaad, toh breaks lein
Tension aur pressure se kisi ka bhala nahi hua hai. Isilye exam ka pressure kabhi na lein. Dhyaan is baat pe rakhein ke aapko acchi taiyyari karni hai na ki is baat pe ke aapko kitne grades laane hain. Acchi taiyyari se apne aap hi acche grades ajayenge. Islye jab bhi lage ke aapke brain ne bhot mehnat kar li hai, usey ek break lekar thoda relax karein.
6. Revision se badhega confidence
Ye humesha kaha jata hai ke practice se perfection aati hai. Isliye har teacher ki apne student se advice hoti hai ke bar bar revise karein. Jitni bar aap ek hi chiz ko padhte hain aur uski practice karte hain wo aapko utne hi acche se yaad rehti hai. Isliye boards aane se pehle kosish karein ke jitne acche se aur jitni efficiently aap revision kar sakein aapki taiyaari utni hi acchi ho payegi.
7. Answers ko points mein likhein
Examiners ka kehna hai ke agar answers points mein ho toh answers ko credit karna easy hota hai aur kisi important point ko miss karne ka chance ghat jata hai. Also, points mein answer likhne se aap ye bhi dhyaan mein rakh pate hain ke aapne answer ke saare matters cover kar liye hain. Aur agar answers points mein honge toh unko exam ke end mein revise karna bhi aasan hoga.
8. Taiyyari ke sath sath Sehat bhi hai jaruri
Ye toh sab jante hain ke exam time bhot hi stressful hota hai. Islye ye jaruri hai ke exam ke dauran aap apne health ka pura dhyaan rakhein. Accha, paushtic aur halka khana khayein, neend puri karein aur apne mind ko relaxed rakhein. Iske sath sath kosish karein ke bahar ka khana aur fast foods avoid karein. Ye jaruri hai kyunki aap nahi chahenge ke aapka ek bhi din tabiyat bigadne ke chalte waste ho jaye.
Inke alawa humesha apne aapko stress free rakhein. Taiyyari ke sath sath apna bhi dhyaan rakhein aur accha khana aur acche se neend puri karein. In sari baton ko humshe practice mein rakhein aur aap exam mein jarur hi accha score kar payenge.
Humein ummeed hai ke in tips ko padhkar aapki taiyyari ki planning asan ho jayegi. Aane wali pariksha ke liye aap sabhi students ko dher sari subhkamnayein.
