Aaj ki generation internet ke bina adhuri hai. Har choti se badi khabar hume internet se mil jaati hai. Chahe woh shopping ho, koi payment ho ya koi sarkari kaam ho, saare kaam internet ke zariye ho jaate hain. Toh agar aap kisi naye business ki shuruwat karna chahte hain jisme kam investment aur achha munafa ho toh humari salah hai ki aap apna online business shuru kare.
Iss video mein jaane ki kaise iss online seller ne online business mein kamaye lakhon.
Ye ek aisa business hai jisse aap ghar se karke lakho kama sakte hai. Agar aap apni website nahi kholna chahte toh aap amazon ya flipkart jaisi websites par jaakar bhi apne products bech sakte hain. Toh agar aap janana chahte hai ki kaise aap bhi apna online business kaise kare, online business shuru karne ki laagat, tareeke, kananu prakriya, marketing etc toh iss blog se aapko aapke saare sawalo ka jawab mil jayenge.
Iss article mein hum aapko batayenge
Apni website se online business kaise kare
Amazon, Flipkart etc. par online seller kaise bane
Online business se munafa ya profit
Inn khaas tips se apna online business shuru kare
Online business kya hota hai?
Aaj ke daur mein kisi ke pas itna samay nahi h ki ve kahi jaakar koi kaam kare , sab chahte hai ki unko har cheez ghar baithe mil jaaye aur unka saara kaam ghar se hi ho jaaye. Logon ke pass paise toh hai lekin unko kharch karne ka samay nahi hai. Yahi unhe zarurat parti hai internet ki.
Online business ek aisa business hota hai jo internet par dependent hota hai. Aap agar online business kar rahe hai toh aap customers ko ye suvidha de rahe hai ki ve ghar baithe baithe apki services ka istemaal kare aur aapse aapke products khareede. Unhe apke pass aane ki ya aapo unke pass jane ki zarurat nahi hogi. Aap internet se hi yeh kaam kar sakte hain.
Online business kaise kare ?
Online business shuru karne ke liye sabse jaruri hai ek achhe aur unique idea ka hona. Aaj ke daur mein online business mein sabse zyada competiton hai. toh aapko iss baat ka khayal rakhna hoga ki aap kuch asia unique aur creative kare taki customers aapke product ki taraf aakarshit ho. Aaye jaante hai ki aap Online business kaise kar sakte hain:
Kis type ka online business shuru kare ?
Online business ka idea sochne ke baad agla step aata hai apni market decide karna aur uss market tak pahuchne ka medium decide karna. Iska matlab aapko ye decide karna hoga ki aap apna product kaha aur kaise bechenge. Aap agar ek online seller banana chahte hai toh aap neeche diye gaye tareeko se apne products bech sakte hai.
- Apni khudh ki e-commerce website develop kar sakte hai
- Amazon ya flipkart jaisi websites se affiliate ( connect) ho sakte hai
- Facebook page / Instagram store ya kisi aur social media website ke zariye apna product bech sakte hain.
Apni website se online business kaise kare
1 Apna product decide karne ke baad aapko apn domain name aur brand name decide karna hoga. Domain name ek aisa naam hotahai jisse aap ek website ko internet par identify kar sakte hain.
2. Apko apni website ka domain name register karvana hoga aur uske saath required fees pay karni hogi, ye kaam kisi bhi domain registrar se karva sakte hain. Aur jaankari ke liye yahan click kare.
3. Domain name register ho jaane ke baad baari aati hai apni website develop karne ki. Yeh kaam aap 2 tareeko se kar sakte hai.
Website making sites ke kuch examples:
4. Website banana ke baad aapko apne products apni website par list karne hote hain. List karte waqt iss baat ka khayal rakhein ki apke customers apke product ko sirf dekh sakhte hain aur uske bare mein padh sakte hain, na toh ve usse touch kar sakte hai na hi usse related koi doubt pooch sakte hain. toh apne products ki picture quality aur content quality ka dhyan rakhein.
5. Har business ko successful banane ke liye marketing bahut jaruri hai. Kyonki aapka business online hai toh yeh behtar hoga ki aap uski marketing bhi online karein. Marketing ke baare mein aur janane keliye yahan click karein.
6. Kyonki apka business online hai toh aap khudh kisi bhi product ki payment receive nahi kar payenge, isliye aapko apne payment method ka bhi dhyan rakhna hoga. Aap iske liye Cash On Delivery aur Prepaid Payment ka method rakhna hoga. COD ke liye aapko apni shipment company se baat karni hogi. Prepaid Payment ke liye apko kisi Payment Gateway Company jaise CCAvenue se judna hoga.
7. Last step hai beche gaye products ki packing, shipment aur delivery. Packing karte samay ye dhyan rakhein ki usse travel karke customer ke pass jana hai. apni shipment company se tracking no. zarur le taaki aapko aur customerko pata chalta rahe ki product kahan hai.
Laagat aur infrastructure
Ek online business shuru karne ke liye zyada laagat ki zarurat nahi hoti. Yeh kaam aapapne ghar se bhi kar sakte hai. online business shuru karne ke liye neeche di gayi cheezo ki zarurat padhti hai
- Laptop ya computer
- Internet connection
- Apke products
- Products ko rakhne ke liye ek jagah
Ye ek aisa business hai jisse aap araam se apne ghar se bina kisi investment ke bhi shuru kar sakte hain. Aajkal laptop ya computer sabke paas hota hi hai. Internet bhi aaj ki generation ki basic requirement ka hissa hai jo sabke paas hota hai. Aapko bas apne products ke liye kuch investment karni hogi. Ye investment ki range iss baat par depend karti hai ki aap konsa product market mein bechna chahte hai.
Kanuni Prakriya
Online business shuru karne ke liye kuch kanuni prakriya se guzarna padhta hai.
- Brand registeration – naye business shuru karne ke liye pehle aapko ye decide karna jaruri hai ki aap kis type ka business chalana chahte hai. Aapko apne business ke structure ke anusaar ye decision lena hoga, yani ye iss baat par nirbhar karega ki aap apna business kis scale par kholna chahte hai. Aapke pas teen options hai:
- Ek proprietorship : ye ek aise type ka business hota hai jo ek insaan dwara chalaya jaata hai. Sole proprietorship mein business ke maalik(owner) aur uske business me koi legal difference nahi mana jata.
- Ek partnership : ye ek aisa business hai jo do ya do se zyada log milkar chalate hai. Jinte bhi owners hain, ve saare business ke munafe, nuksaan aur zimmedariyon ke barabar ke hissedar hote hain.
- Ek Private Limited Company/Corporation: ye ek aisa business hai jo apne maalik(owners) se legally alag hota hai. Yeh ek separate legal identity hai jiske liye owner sirf ek limit tak hi liable ya zimmedar hote hai.
- Domain registeration – agar aap apni website/ ecommerce store start karne ka soch rahe hain, toh aapko apna domain name register karvana hoga. Domain name ka matlab hota hai, aapki website ka woh naam jisse use internet par identify kara jayega. Ek baar domain name choose karne par, aapko usse ek domain name registerar ke pass submit karvana hoga.
Aapko apni application ke sath neeche di gaye information bhi domain name registrar submit karni hogi - Apka domain name
- Domain registrant ka naam aur contact details jaise email id, address, phon number etc.
- Desired domain registration term
- Payment information
Ek baar aap apni information registrar ko dedete hain, uske baad woh apka registration process start kar denge.
India mein bahut saare domain registrars hain, jaise ki:
- Tax compliance – Har business ko apna GST registeration complete karna jaruri hai aur uske saath ek GSTIN/SGST number lena bhi jaruri hai. Ek business ka GST number lene ke liye neeche diye gaye documents ki bhi jarurat hoti hai.
GST registration ke liye aapko GST ki official website par jana hoga. GST ki official website par jane ke liye yahan click karein – Goods and Service Tax
GST form kaise bharein janne ke liye yaha click kare.
- Bank account – ek baar apki company incorporate ho jaaye , apko apni company ke naam par ek bank account kholna hoga, yeh kaam kisi bhi bank mein asasni se ho sakta hai. bank ki choice ka decision lete waqt interest rates aur schemes ka dhyan zarurrakhien. Agar aapki ek proprietorship firm hai toh bank account kholne se pehle aapko VAT registration karvana jaruri hai.
Agar aap apni website khol rahe hain toh aapko apni ke company ke liye ek bank account kholna jaruri hai kyunki jab aap online apna samaan bechenge toh bhaut se log directlyapke account me hi payment karenge. Aur agar aap COD ka option bhi dete hain, toh bhi aapki courier/ shipping company aapke bank account mein hi paymnets transfer karegi. Agar aap kisi dusri website par bhi apna samaan bhechna chahte hai toh who bhi aapseapki bank account details maangte hai jiske bina aap uss website par apna samaan nahi bech sakte.
- PAN number- apne business ko kisi bhi website jaise amazon, flipkart, mynta etc. par register karne ke liye yeh jaruri hai ki apke pass apni company ka individual PAN number ho. Agar aap sole proprietorship mein business start kar rahe hain, toh aapka aur apki company ka PAN number same ho sakta hai, lekin agar aap kisi aur type ka business shuru karne ki soch rahein hain toh aapko apni company ke ekalah PAN number lena hoga. PAN numberka registeration aap online kar sakte hain.
Adhik jaankari ke liye aur PAN number ka registration karne ke liye aap yaha click kar sakte hain.
Agar aap koi food related business kar rahe hain, toh aapke paas FSSAI license hona chahiye. FSSAI license ki puri jankari ke liye yaha click kare
In license ke baare mein detailed jaankari ke liye aap yaha jaa sakte hain
Amazon, flipkart etc par seller kaise bane
Kaafi logon ko apna online business shuru karne se pehle yeh lagta hai ki existing websites ki vajah se unka business successful nahi ho payega, aur isliye ve iss line mein aane se katrate hain. Agar aap apni website nahi banana chahte toh toh aap Amazon, Flipkart, Myntra, Ebay etc jaisi websites se affiliate karke apne products unki website par bech sakte. Iske liye na toh apko apna domain name chahiye hoga aur na hi kahi jakar registration karna hoga. Aap jis website se judna chahte hain, ussi website par jaakar poora registration process follow kar sakte hain.
Neeche gaye steps ko follow karke aap amazon jaisi websites par khudhko ek seller ke taur par affiliate kar skate hain.
Step 1: Amazon par seller ke taur par affiliate hone ke liye aapko sabse pehle amazon ki website par jaana hoga. Amazon ke home page par jaane ke baad aap sabse neeche scroll down karke jaaye, waha aapko ek heading dikhegi “Make Money With Us” usme sell on amazon ke head par click kare.
Step 2 : sell on amazon par click karne kebaad apke saamne ek naya page load hoga jispar amazon par bechne ke fayede dikhenge. Wahan aapko “start selling” ke icon par click karna hai.
Step 3: start selling par click karne ke baad amazon aapse ek account kholne ke liye bolega, yadi apka pehle se hi amazon account hai toh aap login kar sakte hain. Agar nahi hai, toh apko apni details daalkar ek naya account kholna padega
Step 4: ek baar account create ho jaane ke baad agla step mein apko apne company ka naam dalna hoga. Company ka naam dalne ke baad apko seller’s agreement kiterms and conditions par tick karna hoga taaki aap apne aap ko as an amazon seller establish kar paaye. T&C tick karne ke baad aap continue ka icon click kar sakte hain.
Step 5: agle step mein aap apne store ka naam daale. Yeh woh naam hai jisse apki company amazon par dikhaayi jayegi. apne product ki category select kare. Category woh area hai jiske andar apka product aata hai.
Step 6: Apni company ka address daale jahan se apki company operate karti hai. Ek baar address details daalne ke baad continue ke icon par click kare.
Step 7: agle step mein aapko apni tax details daalne ki jarurat hai. Bina GST number aur PAN number ke aap ek seller nahi ban sakte. Aapke paas aage chal ke bhi yeh column update karne ka option aata hai par humari salah yeh hai ki aap yahi yeh details add karde.
Step 8: tax details bharne ke baad apko apne product ki categories dhyan se select karni hongi. Yeh step bahut dhyan se kare taaki apke products sahi category mein dikhe aur customers usse asaani se dhundh paaye.
Step 9: agle step mein aapko apni company ka annual turnover daalna hai or saath mein number of product bhi daalna hai. Iske liye amazon ne aapko alag alag categories di hai jisme se aap apna suitable selection choose kar sakte hain. Aapko yeh bhi batana hoga ki kya aap kisi aur websitepar apne products bech rahe hain ki nahi. Ek baar in sawalo ke jawabdene ke baad aap next ke icon par click kare.
Step 10: iske baad aapko agle step mein apni shipping details add karni hoti hain. Aap chahe toh apne according bhi isko change kar sakte hai varna amazon ke set shipping standards ko follow kar sakte hain.
Step 11: shipping details ke baad apko apne bank account details daalna hota hai taaki apke account mein time to time payments aati rahe. Isme aapko account name, account ka type, account number aur IFSC code daalna hota hai aur usse save karna hota hai.
Step 12: agle step mein ek baar phirse apko apne PAN number aur Gst number ko daalna hota hai. Yeh details daalne ke baad aap save ke option par click kar sakte hain.
Step 13: Aakhri step mein aapko apna digital signature upload karna hota hai. Yeh kaam aap apne sign ko scan karke kar sakte hain. Yeh signature apke har bill par maujood hota hai. Ek baar apna digital signature upload karne ke baad aap apna business amazon par launch kar sakte hain.
Online business se munafa ya profit
Online business aaj kal bhaut demand mein hai. Shopping se lekar sarkari kaam tak , sab kuch ab online ho jaata hai. Online business mein kum lagat hone ki wajah se iss business mein achha munafa ya profit ho sakta hai.
Online business ka koi fixed profit nahi hota, ve upar neeche hota rehta hai. Shuruwat mein zyada munafa na expect karein, aapke product ko logon tak pahuchne mein kuch time lag sakta hai. Lekin aap uno kuch aisa offer karte hai jiski unko jarurat hai toh dheere dheere aapke business mein growth hoti rahegi.
Online business ka profit kayi factors par depend karta hai jaise:
- PRODUCT: Aap konsa product chunte hai usse apke business mein aane wale profit par sabse zyada fark padta hai. Agar aap koi aisa product bechte hain jiski market mein koi jarurat nahi hai toh aapko munafa nahi hoga.
- COMPETITION: Apko apna product chunte samay yeh dhyan rakhna chahiye ki kitne aur sellers hai jo apke jaisa product bech rahe hai. Kyonki aap ek naya business start kar rahe hain, toh aapko competition ka khaas khayal rakhna hoga. Agar apka product already har jagah asaani se sahi dam par available hai toh customers aapki taraf nahi aayenge.
- MARKET: Profit par iss baat kabhi farak padta hai ki kya aap apna product apni nayi website par bech rahe hai ya already established website par bech rahe hain. Agar aap direct apni website se bechte hain toh ho sakta hai ki shuruwati daur mein aapko zyada munafa na ho lekin job hi munafa hoga who aapka hoga. Dusri taraf agar aap kisi dusri website ke madhyam se bechte hain toh aapko uska commission dena hoga.
Iske alawa ek online business ka Profit kayi factors par depend karta hai jaise quality, pricing, marketing etc. Inn sab topics se related tips ke liye aap yaha click kar sakte hain.
Amazon ya Flipkart ke profit commissions
Agar aap apna product Amazon ya Flipkart jaisi sites par beche hain toh ve aapki har sale se kuch commission leta hai. Yeh commission rates bahut nominal hote hai jo seller ke profit par zyada prabhav nahi daalte. Inki khaas baat yeh hai ki yeh commission tabhi charge hota hai jab aapki koi sale hui ho. Aapko monthly ya yearly basis par koi commission dene ki zarurat nahi hoti.
Yeh commission rate depend karta hai ki aap konsa product bech rahe hain. Har product ka alag commission hota hai jo uski category ya weight par depend karta hai. Har product ka commission rate aap uss website par jaakar check kar sakte hain. For example agar aap amazon ke commission rates dekhna chahte hain toh aap yaha click kar sakte hain.
Online business ki marketing
Kisi bhi business ko successful banane ke liye uski marketing karna bhaut jaruri hai. Logon tak apka business pahuchane ke liye aapko alag alag tareeko se apne business ki marketing aur advertising karni hogi. Marketing ke bina ek business mein munafa hona possible nahi hai. Kyonki hum online business ki baat kar rahe hain, to iss business ki marketing bhi online hi honi chahiye. Online marketing karne ke liye aap neeche diye gaye tareeko ka istemaal kar sakte hain.
- Facebook ya instagram page: Aajkal shayad hi koi aisa hoga jo facebook par na ho. Apne business ki marketing karne ke liye aap aisi social media website par ek page bana sakte hain. Facebook apko apke business ke liye free page banane ki suvidha deta hai. Ek baar page ban jaane par aap chahe toh apne product se related baki facebook groups ko join kar sakte hain, isse aapko direct audience mil jayegi. Aap lagatar Apne product se related posts share karte rahein taaki logon ko unki jaankari milti rahi
- Whatsapp marketing: Apne dosto ,rishtedaaro aur parichit logon ko apne product aur website ke baare mein aap whatsapp par bata sakte hain. Attractive post bhej kar aap unhe apni product ki taraf aakarshit kar sakte hain. Whatsapp marketing bhi aap free mein kar sakte hain.
- Google ads aur facebook ads: Google ads ek bhaut achha tareeka hai apne business ko logon tak pahuchane ka kyonki google har koi istemaal karta hai. Aap chahe toh apni advertisement ussi waqt show kar sakte hain jab koi apke business se related kuch dhundh raha ho. Google par advertisement dene ke liye aapko kuch fee pay karni padhti hai. Google ads ke baare mein aur jaane ke liye aap yaha click kar sakte hain.
- Email marketing: aap chahe toh apne customers ko regular emails bhej sakte hai, taaki unko apke product ke baare mein regular information milti rahe. Isse apka product unke dimaag mein chaap chodh jata hai aur unko apke product ke baare mein yaad rehta hai. aap unko apne products upgradation aur naye products ke launch par mail bhej sakte hain taaki ve samay samay par apke products khreedte rahein.
Online business mein awasar
Online business ek aisa business hai jo ki kam lagat mein chalne wala ek behtareen business hai aur kaafi zyada demand ke karan ek successful business idea bhi hai. Isiliye ye kehna galat nahi hoga ke ye business aaj ke daur mein aapke liye kaafi fayedemand ho sakta hai. Iske alawa, ek baar aapne ek successful online business khol lia toh aapko future mein aane wale profit ke baare mein zyada sochna nahi padega.
India mein yeh business bahut tezzi se grow kar raha hai. Online users ki ginti har din badhti jaa rahi hai. india mein e-commerce sector ke growth ke baare mein jaankari ke liye aap yaha click kare
Ek baar apke business chal jaane par aap use online se offline kar sakte hain. Uska offline store khol sakte hai jiske liye apko ek achhi investment karni hogi. Aap chahe toh apne products ki range aur quantity badha kar usse ek bade madhyam par chala sakte hain.
Inn khaas tips se apna online business shuru kare
Online business shuru karne ke liye neeche diye gayi chezo ka dhyan rakhien.
Quality aur quantity se no compromise
Online business hone ke karan logon ke paas yeh suvidha nahi hogi ki ve apke product ki quality khudh check kar paaye. Yeh aapka kaam hai ki aap apni quantity aut quality aisi rakhein ki apke customers ko apse product khareedne ke baad niraash na ho. Yaad rakhein ki apko customers sirf ek sale ke liye nahi , lambe samay ke liye banane hain.
Presentation achhi rakhien
Iss baat ka dhyan rakhein ki grahak apke product ko sirf dekh sahte hain. Toh aap jitni acchi quantity ki photos daalenge apke business ke liye utna achha hoga. Apne product ki saari information apne customers ko de taaki unhe koi shikaayat ka mauka na mile. Achha content bhi apke product ki sale badha sakta hai.
Pricing
Pricing karte samay ye dhyan raakhien ki apke product ka price saari costs bhi cover karle aur apke customers ke lie bhaut zyada bhi na ho. Competitors ka khaas dhyan rakhein. Kyunki aap ek naya business shuru karne jaa rahe hai toh aapko apne product ki pricing apne competitors se kam rakhni chahiye.
Delivery sahi time par karein
Chahe aap apni website se business kar rahe ho ya kisi dusri website ke zariye, delivery ki zimmerdari aap par hi hoti hai. Customers ka experience achha karne ke liye yeh jaruri hai ki aap unke khareede hue products ki delivery time par kare taaki unko koi shikayat ka mauka na mile.
Payment ke alag alag options rakhein
Kayi aise log hai jo prepaid delivery karna pasand nahi karte. Toh aap iss baat ka dhyan rakhien ki aap apne customers ko zyada se zyada payment options de taaki unhe apke products khareedne mein koi dikkat na ho.
FAQs
Ques 1. Amazon ka commission rate kitna hota hai?
ans 1. Amazon har item ke hisaab se alag commission leta hai. Commission rate ke baare mein janane ke liye aap yaha click kar sakte hain.
Ques 2. Bank account current hona chahiye ya saving ?
ans 2. Aap chahe toh current account ya savings account mein se koi bhi account apne business ke liye khol sakte hai. adhik jaankari ke liye yaha click kare
Ques 3. Kya homemade products amazon par bechne ke liye bhi GST ki jarurat hoti hai?
ans 3. Aapko agar koi bhi product bechna hai toh aapko gst ki jarurat hogi. Bina gst ke liye aap apna business shuru nahi kar sakte . Adhik jaankari ke liye yahan click kare
Ques 4. Amazon ya Flipkart par business karne ke liye GST NO. kahan se prapt kare?
ans 4. GST ke baare mein poori jaankari ke liye yaha click kare
Ques 5. Company me as a seller register hone ke liye konsi process ko follow kiya jata hai?
ans 5. Agar aap kisi established company jaise amazon mein as a seller register hokar apna product bechna chahte hain toh aap yaha click kare
Ques 6. Online business shuru karne ke liye website kaise banaye?
ans 6. Agar aap apni khudhki website kholna chahte hai toh uske process ke baare mein padhne ke liye aap yaha click kar sakte hain.
Humein umeed hai ki iss information se aapko kaafi had tak samajh aagaya hoga ki India mein online seller kaise bane ya kaise apna online business shuru kare. Humne puri kosish ki hai ke shuruwat se ant tak aapko har sawal ka jawab mil jaye. Agar abhi bhi aapko kisi jankari ki jarurat ho toh comment mein jarur puchein. Hum aapki puri madad karenge.
