Chef Kaise Bane? – Chef Career Se Judi Saari Jaankari

12^th karne ke baad har student ek aisa professional course karna chahta hai jo usse achi naukri aur achhi salary jald se jald dila de. Chef career iske liye ek acha option ho sakta hai. Agar aapko nayi dishes invent karne mein aur logon ko apne haath ka khana khilane mein maza aata hai toh yeh course apke liye fayedemand saabit ho sakta hai. Lekin chef bane kaise

Iss article mein aaj hum aapko batayenge “how to become a chef in India” yani Bharat mein chef kaise bane. yahan aapko milegi chef career ke liye eligibility, courses, colleges, salary, benefits aur job opportunities se related poori jaankari.

Iss article mein hum aapko batayenge

Chef ka matlab kya hota hai

Chef ke types aur anukram (hierarchy)

Chef kaise bane – step by step guide

Chef banane ke liye eligibility

Chef banane ke liye colleges aur courses

Chef career mein job opportunities

Chef career mein career options aur salary

Chef banane ke liye jaruri skills

Chef ki duties yani jimmedari

Chef ka matlab kya hota hai

Chef kaise bane se pehle sawaal ata hai ki chef ka matlab kya hota hai?

Chef woh hote hai jo kisi restaurant ya hotel mein ek professional cook ki tarah kaam karte ho. Generally kisi bhi achhe restaurant ya hotel mein khana banane or supervise karne wale vyakti ko chef kaha jata hai.

Ek chef khana banane mein, usse present karne mein, nayi tasty dishes develop karne mein, poore kitchen ko manage karne mein, aur kichen se jude har kaam ko karne mei trained aur kushal yani skilled hota/hoti hai. Bahut logo ko aisa lagta hai ki chef sirf khana pakane ka kaam karte hain. Lekin ye baat bilkul sach nahi hai. Ve sirf khana pakane tak seemit nahi hai. Typically, kisi bhi kitchen ke chief yani pramukh cook ko chef kaha jaata hai. Unke paas poore kitchen ki jimmerdari hoti hai.

Chef aur cook mein difference

Chef ke types aur anukram (hierarchy)

a) Commis chef: Ye aise chef hote hain jo chef de partie ke neeche kaam karte hain aur station ki zimmedariyon aur sanchalan yani operations ko seekhte aur samajhte hain. Ye ve chef hote hain jihone abhi-abhi apni training khatam kari hai ya abhi training kar rahein hain.

b) Chef de partie ya station chef: Chef de partie jinhe station chef ke naam se bhi jaana jata hai kisi vishesh area ke production incharge hote hain. Har bade kitvhen mein alag alag station cooks hote hain jinke sath unke assistants aur juniors bhi hote hain.

c) Sous chef : Sous chef ka matlab hota hai “under chef”. Sous chef, executive chef ke assistant hote hain. Ye executive chef ke baat “second in command” aate hain. Rozana ki baagdod sous chef ke haath mein hoti hai.

d) Executive chef: Yeh kitchen hierarchy mein sabse upar aate hain. Poore kitchen ki management inke haath mein hoti hai. Ye poore kitchen ko manage kate hai, kitchen staff ki scheduling se lekar budgeting tak, sari jimmedari sous chef ki hoti hain.

Aaiye ab aapke sabse imporatant sawaal ka jawab dete hai ki chef kaise bane ?

Chef Kaise Bane – step by step guide

Chef banane ke liye eligibility

Jin logon ne 10+2 yaani baarvi pass kari hai ve chef banane ka course kar sakte hain. Bina 10+2 diye aap koi bhi achha chef ka degree course nahi kar sakte, har institute ka alag course duration yani avadi hoti hai.

Aap chahe toh chef banana ke liye degree ya phir diploma course kar sakte hain. Degree or diploma couses ke liye eligibility thodi alag ho jaati hai.

Chef banane ke liye aap hotel management ki degree le sakte hain. Chef banane ke liye ye sabse common aur lokpriya course hai. Kisi bhi achhe college se hotel management karne ke liye required eligibility criteria ye hai:.

• Hotel management ke liye minimum qualification 10+2 hai jisme aapke 12th ke subjects mein english hona jaruri hai.
• Hotel management ke liye unreserved aur OBC categories ki upper age limit 22 years honi chahiye. SC/ST categories ke liye ye age limit 25 years hoti hai. Magar humara suggestion hai ke aap jab bhi kisi college ke liye apply karenge toh aapko us specific college ki eligibility pata kar lein.
• Hotel management mein career banane ke liye aapko kisi recognised college se degree leni hogi aur iske liye aapko us specific college ka entrance exam clear karna hoga.
• Entrance exam do bhagon mein divided hota hai. Pehla – Aptitude test jisme aapko English, Reasoning, General Science aur General Knowledge mein Multiple Choice Questions par test dena hoga. Dusra – Group Discussion (GD) aur Personal Interview (PI) jismein aapke speaking skills, confidence aur attitude ko dekha jata hai.

Agar aap degree course nahi karna chahte toh aap kisi achhe institute se certificate course ya diploma course karke bhi chef ban sakte hain. Diploma course karne ka eligibility criteria kuch iss prakar hai:

• Inn institutes ko join karne ke liye apke pass 10^th pass ka certificate hona jaruri hai.
• Inn couses ko karne ke liye koi minimum pass percentage ki jarurat nahi hoti, na hi koi entrance exam dena padta hai.
• Ye diploma courses bade batches mein conduct hote hain jo khana banane se lekar uski presenatation tak saare topics cover kar lete hain.

Chef banane ke liye colleges aur courses

Chef kaise bane ? Iss sawal ke jawab ka pehla step hai sahi course select karna. Chef banne ke do raaste hote hai

1. Kisi institute se formal culinary course leke aap chef ke profession mein career bana sakte hain.
2. Ek anubhavi chef ke saath apprenticeship karke bhi aap iss field mein jaa sakte hain.

Humari raay ye hai ki aap pehle formal degree ya diploma course karle, isse aapko behtar exposure, guidance aur job opportunities mil sakti hain.

Chaliye ab baat karte hain formal training ki . Formal training se humara matlab hai ki kisi achhe institution se culinaty arts, catering ya hotel management ka degree ya diploma course. Anya jaankari ke liyeaap neeche diye gaye courses ke bare mein padh sakte hain.

India mein aap teen tarah ke courses karsakte hain:

1. Degree course
2. Diploma course
3. Certificate course

Hotel management ke liye 12th pass students ko entrance exams mein appear hona hota hai, jiske bad woh un entrance ke through college mein admission le sakte hain. National Council of Hotel Management Joint Entrance Examination (NCHM JEE) ek aisa entrance exam hai jo ki hotel management career ke liye sabse jyada demand mein hai.

Inke alawa aur bhi entrance exams hote hain jo ki National, State, University or Hotel specific hote hain. Inn exams ke baare mein janane ke liye aap yaha click kar sakte hain.

Inke alawa all over India kayi aur bhi private institutes hain jahan se aap hotel management courses kar sakte hain. Iske liye aap apne choice ki university se pata kar sakte hain ke wahan hotel management ki courses hain ya nahi aur unka process kya hai.

Course duration

• Jo institutes National Council of Hotel Management ke under aate hain, ve teen saal ka diploma course offer karte hain.
• Doosri taraf Private institutions four years ka Bachelor’s program offer karte hain.

Diploma course offer karne wale top institutes

• Army Institute of Hotel Management and Catering Technology ,Bangalore
• Merit Swiss Asian School of Hotel Management, Ooty
• Oriental School of Hotel Management, Kerela

India mein aise bahut saare instituted hain jo catering aur food processing se related diploma course bhi offer karte hain. Inn course ki duration 6 mahine se 18 mahine tak ka hota hai.

Inn couses ki khaas baat ye hai ki aap isme alag alag tarah ki specialisation bhi kar sakte hain. Ye diploma courses ke liye aapko koi khaas qualification ki zarurat nahi hoti sirf 10^th ya 12^th pass hona hota hai. Ye aise courses hai jisme mei chef ke career se related hi topics cover hote hain, baaki hotel management ke subjects isme nahi padhaye jaate. Ye course baaki HM ke degree courses ke mukable mein sasta bhi padhta hai.

Ek baar yeh courses complete ho jaane par students junior starr se hotels mein naukri kar sakte hain.

Course fees

Ab baat karte hain ke chef ya hotel management course karne mein lagbhag kitna kharcha aa sakta hai. Yahan hum bata dein ke admission fee har ek college ki alag alag hoti hai. College ke rank aur reputation aur course par depend karta hai ke aapki admission fee kya hogi.

Dekha jaye toh kisi naami private university se hotel management mein bachelor degree lene par pure course ki fees kam se kam Rs. 5,00,000-Rs.6,00,000 ya usse jyada bhi ho sakti hai.Yahi degree agar aap kisi government institute se karenge toh fees Rs.2,00,000-Rs.3,00,000 tak ho sakti hai. Ye humne ek approximate range bataya hai. College ki fees regulatory bodies dwara kam ya jyada hoti rehti hai. Fees se judi puri jankari aapko ussi college ke website par aasani se mil jayegi.

Chef career mein job opportunities

Hospitality industry ek badhti hui industry hai. Ye ek behtareen job option hai jo ki young generations ke liye kaafi opportunities lata hai.

Ek degree/diploma haasil karne ke baad aap kisi bhi hotel mei ek trainee chef ke taur par join kar sakte hain. Ek trainee ko hotel ya restaurant mein kaafi saari opportunities mil sakti hai jaise permanent job, promotion aur kayi dusre benefits. Ye ek galatfaimi hai ki hotel management graduates sirf hotel industry mein kaam kar sakte hain. Aap chahe to anya fields mein placements paa sakte hain jaise air catering, cruise liners, food processing units, corporate companies, bakeries, confectionaries etc.

Aap chahe toh apna koi kaam bhi shuru kar sakte hain. Chef banane ke bad aap apna khudh ka restaurant ya catering business bhi khol sakte hain jaha aapki post ek head chef ki hogi aur aapke neeche chef ya trainee ko rakh kar kaam karva sakte hain.

Chef banne ke baad aap recipes se related koi kitaab likhar bhi paise kama sakte hain aur ek lekhak (writer) ke roop mei bhi famous ho sakte hain.

Chef career mein career options aur salary

Ek chef ki salary anya factors par nirbhar karti hai jaise anubhav, yogyata, job title , kaam karne ka tareeka, geographic location, hotel ya restaurant ka level etc.

• Trainee ya commis chef – students apni padhai poori karne ke baad, ya apna course karte waqt hi ek trainee ya commis ke taur par kisi restraunt ka hotel kitchen mein job sakte hai . Iss shuruvati daur mein students ko offer ki gayi salary Rs. 10000 se Rs. 20000 tak hoti hai
• Station Chef –  do saal ka anubhav ho jaane ke baad hi trainee ko station chef ki post par promote kiya jaata hai. Ye promotion trainee ki mehnat aur performance par nirbhar karta hai. Iss promotion ke baad salary badhti hai or lag bhag Rs. 25000 se 40000 tak ho jaati hai jiske saath aapko kuch orr benefits aur vishesh adhikaar bhi milte hain.
• Sous Chef – sous ched banane ke liye lagbhag 6 saal ka anubhav aur nishtha chahiye hoti hai. Ek sous chef ko nayi dishes banani aani chahiye. Sous chef ki minimum salary  Rs. 60,000 se shuru hokar Rs. 80,000 tak jaati hai jiske saath aapko kaafi saare benefits aur adhikar milte hain.
• Executive Chef –  aap executive chef tabhi bann sakte hain jab aane pehle saare job titles ko experience karlia ho. Executive chef sabse oonchi position hoti hai. Ek executive chef ki salary ki shuruvat Rs. 80000 se hoti hai jo laakho mei jaa sakti hai. executive chef ki basic average salary Rs. 1,00,000 se Rs. 1,20,000 tak hoti hai jinke sath unko hotels mein rehna , personal gaadi, aur bhi kayi benefits mil sakte hain.

Hotel Groups ke dwara di gayi Average Chef Salary

Neeche diye gaye table mein entry level chef salary ki jaankari hai jo hotel goups offer karte  hain. Ye average range mein har type ke chef include ho jaate hain jaise commis, sous, station chef aur executive chef.

Aur jaankari ke liye yaha click karein.  

Chef banane ke liye jaruri skills

Ek chef ka kaam sirf khana pakane tak seemit nahi hota. Ek chef khaane ki poori research karta hai, experiment karta hai aur nayi dishes invent karta hai. Kisi bhi chef ki creativity aur skill seemit nahin hain, ve badhate rahate hain. Ek achha chef banane ke liye aapke pass neeche diye gaye skills hone chahiye.

• Khana banane ja junoon – bina khana banane ke junoon ke aap nayi dishes invent nahi kar paayenge naa hi apni dishes ko tasty bana payenge.
• Hygiene – kyonki ye ek food related career hai, toh iske liye hygiene banaye rakhna bhaut jaruri ho jaata hai.
• Innovator – kisi bhi chef ko nayi dishes invent karne ki bahut zarurat hoti hai taaki ve apne grahako ko samay samay par naye khaane ka anubhav de paaye
• Smell aur taste ka achha sense – kisi bhi dish ko present karte samay customer usse khaane se pehle aakho se dekh kar aur uski khushboo ko smell karke yeh decide karta hai ki who usse khana chahta hai ya nahi. Isiliye aapko inn dono cheezo ka khaas khayal rakhna chahiye.
• Organizational Skills – koi bhi disorganised insaan ek chef nahi ban sakta kyonki ek chef banane ke liye multitasking qualities ka hona jaruri hai.
• Patience aur Stamina – khana banana sunne jitna asaan nahi hota. Agar aapmein dheeraj hai tabhi aap ek tasty dish develop kar payenge. Kitchen mein lambe samay tak kaam karne ke liye sehansheelta yani stamina aur willpower ki bhaut jarurat hai.
• Confidence – aapko apni skill aur culinary arts par confidence hona chahiye taaki aap nayi dishes achhe se innovate kar paaye aur usse apne grahako ke saamne present kar paaye.
• Achhi Memory – ek achha chef banane ke liye ye ek achi memory hona bahut jaruri taaki who apni best aur creative recipes ko yaad rakhe aur uske taste aur flavours mein koi antar na aaye.

Chef ki duties yani jimmedari

Chef ke career mein kayi elements hain, ye career sirf khana pakane tak seemit nahi rehta, iske aage bhi chef ke upar kayi zimmedariyan hoti hain. Kuch aisi hi duties yani zimmedariyan neeche mention ki gayi hain:

• Chef ki primary duty nayi recipes develop karne ki aur apni har dish ko tasty banane ki hoti hai
• Senior level Chef ko mustitasking karni padhti hai, usse poore kitchen ko sambhalna padhta hai doosri taraf station chef ko apni poori team ki jimmedari leni padhti hai
• Chef ko iss baat ka bhi dhyan rakhna hota hai ki grahak ki plate mein khaane ka sahi portion jaaye. Portion ki quantity ek chef hi plan aur decide karta hai.
• Chef ko menu prepare karne ki poori jaankari honi chahiye, konsi dish konse menu mein kis price par ayegi, yeh sab chef ko plan karta hota hai.
• Chef ko sirf khane par dhyan nahi dena hota usse poore kitchen ko supervise karna hota hai taaki kisi bhi area mein koi dikkat na aaye.
• Sabziyaan, masala, equipments  aur baaki raw material ke stock ki sahi availability ho, uske liye chef ko hi markets aur vendors se baat karni hogi.
• Khaane ke quality aur swaad mein koi fark na aaye iss baat ka bhi dhyan chef ko rakhna padhta hai. Agar taste mein far kaya toh customers aapki dish khaana pasand nahi karenge.
• Khane ki sahi quantity ka bhi chef ko khaas khayal rakhna chahiye. Bar bar portions ki quantity ko change karna achha impression kharab kar sakta hai.
• Aur sabse jaruri, kisi bhi chef ko cutomers aur apne colleagues se theek se baat karni aani chahiye, unmein communication skills aur moral values ki koi kami nahi honi chahiye. Unhe confident hona chahiye taaki customers ke kisi bhi doubt ya sawaal ka jawaab de paaye.

Umeed hai aapko is article se puri jankari mil gayi hogi ki aap chef kaise bane aur kaise aap apne chef career ki shuruwat kare. Agar abhi bhi aapke mann mein koi bhi sawaal ho ki chef kaise bane toh aap humein comment section mein likhkar batayein, hum aapke saare sawalo ke jawab dene ki poori koshish karenge.

Iske alawa 12th ke bad aur bhi kayi career options hain jinme aap apna bhavishya bana sakte hain. Jyada jankari ke liye yahan click karein