Foodtruck Business Plan In Hindi

Foodtruck ek naye tarike ka restaurant hai jaha khana ek van ya truck se becha jata hai.Ye business bade shaharo mein kaafi popular hai. Kaafi log aate jaate aise foodtruck ko dekhte hai aur khane ka sochte hai. Agar aapke bhi banaye hue khane ki log taarif karte hai, ya aapne kabhi apna foodtruck business kholne ke baare mein socha hai toh ab aap aasani se khol paayenge kyonki hum aapke liye laye hai foodtruck business plan ki puri jaankari.

Iss article mein hum aapko batayenge

Foodtruck business kya hai

Foodtruck business ke liye qualification

Market ki jaankari

Kanuni prakriya

Punji aur Infrastructure

Foodtruck munafa

Foodtruck ka prachaar

Foodtruck business tips

Foodtruck se jude sawaal jawaab

Foodtruck business kya hai

Foodtruck ka matlab hai ek dukaan jismein van/truck se khana becha jata hai. Aise food business mein bethne (dine in experience) nahin hota. Agar isko asaan kare toh aise samjha ja sakte hai ki ek truck jisse khana becha jata hai, aur ek jagah se doosri jagah move kiya ja sakta hai.

Foodtruck business ke liye qualification

Foodtruck ke business ke liye aapko graduate hona zaruri nahin hai, yadi aap 18 saal se upar hai aur aapko khaana banana aata hai toh aap ye business khol sakte hai. Iss business ke liye aapko koi specific padaai nahin chahiye lekin aap agar khana banana seekhe toh kaafi achha hoga varna aapko ek chef ko rakhna hoga.
Ismein agar aapko food related courses ki knowledge hai toh kaafi achha hai.

Market ki jaanakri

Location koi aisi jagah dhundhe jaha par aas paas aapke jaise food vans na ho aur jagah crowded ho. Aapka truck door se dhikhna chahiye aur traffic rules ke mutabe kisi ko dikkat nahi honi chahiye. Koi aisi location jaha bahut offices ho, aas paas ghar ho, ya shopping complex toh achi baat hogi.

Example ke taur pe jaise kisi college ke paas ya mall ke bahar.
Apne shahar se bahar jaate ve bhi kaafi foodtruck raaste mein dhikte hai.

Foodtruck mein kya kya bech sakte hai?

Ye sabse zaruri hai ki aap kis cheez ka foodtruck business shuru karte hain. Mein aapko ye sujhaav dunga ki wo aisi cheez (cuisine) honi chahiye jo aapke aas paas baaki foodtruck vaale na bechte ho. Jaise agar ek market mein Chinese(momos, chowmein spring roll) food van hai toh aap vaha ice cream ya phir South Indian food van ya sandwich ka foodtruck khol sakte hai.

• Aap drinks, chocolates, mineral water bhi saath mein rakh sakte hai.
• Zyadatar India mein teen type ke foodtrucks dheke jaate hai
• Chinese, Fast food aur South Indian.

Kanuni prakriya

Foodtruck ka business kholne mein aapko kuch licenses hai jo anivarya chahiye honge.Inn licenses ke bina foodtruck kholna illegal hai.

1. FSSAI License

Yahan hum kam laagat mein bakery business shuru karne ki baat kar rahe hain, isiliye aaj hum registration ke bare mein hi janenge.

Registration ke liye ye zaruri documents

• Photo of Food Business Operator
• Document for Identity Proof like Ration Card, Voter ID Card, PAN Card, Driving License, Passport, Aadhar Card, Senior Citizen Card, Department Issued ID
• Supporting Documents (if any):- NOC by Municipality/Panchayat, Health NOC

Registration ka process

1. Application form fill karne ke liye click kare
2. Sare required documents upload kare
3. Upar bataye hue documents  submit karne ke baad ,govt ke dwara aapke food product ka inspection hota hai.
4. Successful inspection ke baad FSSAI licences ,department ke dwara issue kiya jayega

Ye license aap kisi private agency ke through ya online government website par bhi jakar khud bhi bana sakte hai.

NOTE: Food licences 1 se 5 saal tak ke liye diya jata hai jo aapko renew karna hota hai  license expire hone ke 30 din phele tak. FSSAI License kaise lete hain ka pura A to Z procedure janane ke liye aap yahan click karsakte hain. Humne iss par detailed article likha hain.

2. NOC ( Non Objectional Certificate) from Municipal Corporation aur RTO

Non Objectional Certificate apne local municipal corporation se aur RTO se chahiye hoga taaki aap apna business run kar paye bina kisi takleef ke.

Ye ek stamped document hota hai  jo local municipal authority se milta hai.

3.  Fire Safety License from Fire Department- Kitchen mein kyunki gas appliances ka prayog hota hai toh uske liye  fire department se fire safety license lena zaruri hai. Iska application online fill hota hai state government ki website pe jaake. Application ke baad aapke saare equipments sahi jagah pe hone chahiye aur aapne saari fire guidelines follow karni honi chahiye, uske baad aap chief fire officer inspection ke liye bula sakte hai. Ismein koi fees nahi lagti hain.

• Delhi Fire Service
• Mumbai Fire Service
• Uttar Pradesh Fire Service

4. Commercial truck papers aur Insurance – Pure gaadi ke kaagaz aur pollution paper hone bahut zaruri hai har samay.

5. 40 lakh se jyada sales yearly toh GST Registration anivarya hai. GST registration kaise kare ki puri details aapko yahan click karke mil jaegi.

6. Shop and Establishment Act License-

Agar aap apne state mein koi dukan ya business shuru karte hain toh aapko state government ke labour department mein Shop & Establishment Act ke under Shop ka registration karana hoga. Ye registrations online kia ja sakta hai aur registration ke liye aapko us state ke repective labour department ki website par jakar Shop registration karana hoga.

Registration ke liye kuch information ki jarurat hoti hai jaise –

1. Shop ka naam
2. Shop ka address
3. Manager ka naam
4. Kis tarah ki shop hai, jaise, electronic, beauty parlour etc.
5. Kitne employees kaam karenge

Registration ke liye ye documents lagenge

1. PAN / Aadhar Card / Driving License/ Voter Id
2. Photo of Owner
3. Rent Agreement, if Rented
4. Electricity Bill
5. Driving License- Aapko apne vehicle chalane ke liye driving license chahiye hoga kyonki truck ya van aapko idhar se udhar chala ke move bhi karni hota hai.
6. Eating House License- Koi bhi business jismein eating facility ho unhe ye license lena zaruri hai.

Ye aapko apne shahar ke licensing Police Commissioner se milega. Isko paane ke liye aapko apne state ke police commissioner ko application likhni hogi.

Punji aur Infrastructure

Ye sirf ek andaza hai har jagah ke alag rates hote hai.

Aap kisi ka chalta chalaya foodtruck acquire bhi kar sakte hain. Isse ye fayda hoga ki aapko setup nahi karna padega kuch aur ownership transfer hojaegi. Ismein investment zyada lagti hai par agar aapke paas money tyaar hain aur aap foodtruck business mein ghusna chhate hai toh ye step ko nazar mein rakh sakte hain.Yadi aapko business shuru karne ke liye loan lena hain toh aap yahan click karke uski puri jankari pa sakte hain.

Food truck for sale– Agar Foodtruck ya van ya koi sa bhi commercial vehicle aap kahridna chahte hai toh niche diye gaye links par  jaake aap kharid sakte hai.

• Foodtrucker
• Indiamart
• Vcrea8

Foodtruck munafa

Agar aapke paas roz ke achhe customers aa rahe hai toh aap aaram se mahine ka Rs. 45000-1, 00,000 kama sakte hai.

Food business main kam se kam 40-50% ka profit margin rehta hai.

Foodtruck business mein aapka dhandha ek location par na chale toh aap dusri location par shift ho sakte hai. Thode samay baad aapka fixed cost recover ho jaayega aur aap isse expand kar sakte hai.
Example ke taur pe agar aap ek plate Idli bechte hai jo ki 40 rupe ki bikti hai toh aap usmein se 18-20 rupe kama sakte hai.

Foodtrucks ke tarike aur unka mahine ka sales aur profit margin

Timings pe bhi kaafi farak padta hai. Zyada tar foodtrucks sham ke time aate hai kyunki uss samay rush zyada hota hai. Upar diya gya data  foodtrucks ka hai jo din ke time aate hai aur unka maximum sales shaam se shuru hota hai.

Foodtruck ki designing

Foodtruck business mein kaise truck dikhta hai usse bahut farak padta hai. Kaafi logon ko sirf truck dhek ke khana khane  ka man karta hai. Aap alag alag tariko se apne foodtrucks ko design kar sakte hai.
Theme ya cuisine ke hisaab se design kiya va van/truck alag hi chamakta hain. Speaker ke form mein, ice cream ke form mein kaafi log apna truck design karvate hai.
Agar aap purana truck kharidte hai toh usse design karva ke naya banva sakte hai.

Foodtruck ko kaise attractive banaye

1.  Aap ek achha sa light wala board banva sakte hai jo ki raat ko chamke aur apke naam ki branding ho.   

2. Aap aas paas ped par direction laga sakte hai.

3. Counter aur window size bada achha rakhein. Logon ko khana bante ve dhek ke  ek achha impression padta hai.

4. Aap kuch trendy sa ya apne brand ki tagline truck par likhva sakte hai.

5. Aas paas colorful chairs aur tables rakhenge toh achha rahega par ye jagah par depend karta hai varna aap sirf standing table rakh sakte hai.

6. White board istamaal kare aur uspe apna menu likhe. Aapki aajki special dish ya all time favourite aap circle karke upar likh sakte hai.

7.Raat ko aap headlights on aur area rules ke hisaab se music bhi chala sakte hai.

Foodtruck ka prachaar

Apne foodtruck lagaya aur khana bechna shuru kiya par kaise aap aur logon tak pahunche aur unhe apne food business ke baare mein bataye. Niche humne kuch tarike bataye hai jo aap follow kar sakte hai apna food business badane ke liye

1. Facebook page ke dwara- Apna ek facebook page banayein aur usmein photo video share kare. Apne customer ko photo share karne ko kahe aur aap unhe uske badle kuch discount de sakte hai.

2. Dusra tarike hai Google My Business- Isse hum local SEO bhi kehte hai ismein aap register kare free mein jaake apne google id se aur apne customer ko review daalne ke liye kahe.

Jab bhi koi Food trucks ya fast food van near me search karega upar teen listing mein aap aa sakte hai.

3.  Teesra tarika hai parche ,newspapers ke saath baat sakte hai.

4.  Apne staff ko apne logon ya naam vaali uniform de sakte hai.

5.  Online food delivery apps ko apne par register kare jaise Zomato, Swiggy      aur online orders paaye.

6.  Kaafi saari metro cities mein Foodtruck festivals hote hai toh aap vaha jaake stall leke apna truck ke through sell kar sakte hai.

7.  Apne dukaan ke business cards aur menus baat de aas paas ke gharo mein.

8.  Apne truck ek aas paas aap free wifi ki suvidha de sakte hai.

9. Agar aap naya fast food business ko badana chahte hain toh pura detail yaha paayein.

Foodtruck business tips

1. Food Festivals ka pura laabh uthaye. Ek food festival jo hota hai Delhi mein uska naam hai Horn Ok Please.
2. Ek location par na chale toh location badal ke dheke.
3. Koi seasonal item bhi aap rakh sakte hai jaise sardiyo mein halwa hota hai.
4. Coupons aur collaborations kar sakte hai.
5. Apne customers ko retain karne ke liye unhe discounts de sakte hai.
6. Apne khane ko combo bana ke bhi bech sakte hai.
7. Apne foodtruck ke aas paas lights laga sakte hai taaki wo raat ko chamke aur dhekne mein aur asaani ho.
8. Apne ek video shoot karke YOUTUBE par daal sakte hai ya food channels ke saath collaboration kar sakte hai
9. Quick Service aur hygiene ka pura dhyan rakhe wo aapko dubara customer laake dega.
10. Achhe se dustbins rakhe aur aas paas safaai ka dhyan rakhe.
11. Apne business ka naam aise rakhe jo related ho aur logon ko yaad rahe.
12. Yadi aapka sale bade toh aap ek billing machine ya POS software lele jisse aapko kaafi asaani hogi.
13. Agar aapka purana foodtruck hai toh aap usko design karva sakte hai aur jisse ki wo attractive aur bhi sundar lagega.
14. Ek Foodtruck achha chale toh aur trucks kharidke apna kaam badaye.
15. Catering orders se bhi aapke brand ko kaafi fayda hoga .

Foodtruck business ke fayde

1.Iss prakaar ke business model mein kam paise lagte hai aapko jagah nahin kharidni padti, table chair, AC, staff aur sab bhaari kharche vaali cheezein jo ek dine in restaurant mein chahiye hoti hai.

2. Location benefit- Agar ek jagah par customers nahin aare aur toh aap truck location shift kar sakte hai aur vaha customers ka response dhek sakte hai.

3. Visibility- Ek foodtruck ko dhekna asaan hai, spot karna asaan hai chalti gaadi se, pedal.

4. Different- Foodtrucks kaafi akarshit hote hai aur aajkal bahut trending hain.

Foodtruck ek behetreen business model hai agar aapko khane mein interest hai toh. Ye alag hai normal restaurant se. Goa aur Bengaluru mein iss prakaar ke foodtruck aapko adhik milenge. Ek foodtruck business ka chalna kaafi cheezon par depend karta hai jaise ki taste, service,hygiene, customer ki tahsali. Ek food van kholne ke baad aapko aur kholne mein mushkil nahi hogi aur aise aap isse expand kar sakte hai.

Foodtruck business plan se jude kuch zaruri sawaal jawaab

Q1). Kya NOC lena zaruri hai?
Ans. Hanji, NOC apne local municipal aur police thane se lena bahut zaruri hai varna aap apna foodtruck business aise kahi par  khol nahin sakte.
Authority ke bina road par foodtruck business park karna galat aur illegal hain.

Q2). Konsa cuisine ka foodtruck khole?
Ans. Cuisine( kya bechna hai) aap uss hisaab se decide kare jo aapko interest hain aur banana aata hai.
Varna aap online dhek dhek ke seekh sakte hai ya koi course kar sakte hai. Par aapke aas paas kya bik raha hai uska dhyan zarur rakhe aur usse alag kuch start kare.

Q3). Park kaha par kar sakte hai?
Ans. Parking location sabse zaruri cheez hai foodtruck business mein. Aap kisi crowded jagah dhundhe jaha badi tagaad mein rozka logon ka aana jana ho. Kahi offices , residential, parks area ke paas aap shuru kar sakte hai.

Q4.) Police se permission lena zaruri hai?
Ans. Agar aapke paas saari permission aur licenses hai jaise NOC police se aur municipal corporation se  toh aapko kisi ko paise dene ki koi zarurat nahin hai. Agar koi puchne aaye toh aap apne documents dikha de unhe. NOC ke liye click kare

Q5). Kaise apne Foodtruck ka business ko badaye?
Ans. Aap apne purane customer ki ek video banake unse review leke social media platforms jaise- Facebook par daale kyonki video review ka aaj kal kaafi achha response hai.Aur aap kuch offer aur special discounts bhi nikaal sakte hai. Shaadi jaise bade events mein aap outdoor catering shuru karke bhi apna business bada sakte hai.

Humein umeed hai ki iss foodtruck business plan in Hindi se aapko samajh agaya hoga ke kaise aap ek foodtruck business shuru kar sakte hain. Agar aapke mann mein iske alawa aur bhi koi sawal hai toh comment karke humse zarur pucchein.